Oiartzungo udaleku irekietako haurren eta begiraleen izen-ematea, datorren astean
Urtero bezala, aurten ere haur eta gaztetxoentzako udako eskaintza antolatu du udalak. Udaleku irekiak edo udako kirol eskaintza izango dituzte aukeran, adinaren arabera, 4-16 urteko oiartzuarrek.
Udaleku irekietako haurren izen-ematea datorren hastean hasiko da, astelehenean (hilaren 11). Martxoaren 23ra arte egongo da zabalik, Gazte Informazio Bulegoan —Mendiburu kaleko 5. zenbakian— eta ordainagiria aurkeztu beharko da.
2000 eta 2009 urteen artean jaiotako haurrentzako udalekuak dira (oiartzuarrak edo bertan ikasten dutenak izan behar dute), eta uztailean egingo dituzte goizetan, 1etik 26ra. Horien oinarria, udalak gogorarazi duenez, “euskara, dibertsioa, jolasak, bizikidetza eta autonomia dira”.
Aurten, lehen aldiz, hamabostaldika izena emateko aukera ere izango da: uztailaren 1etik 12ra edo 15etik 26ra. Hirugarren aukera, hilabete osokoa da. Azken aukera hori hautatzen dutenek, 70 euro ordaindu beharko dituzte, eta 35 euro hamabostaldia aukeratzen dutenek.
Autobus zerbitzua ere jarriko dute, behar dutenentzako. 96 euro balio du zerbitzu horrek hilabete osorako, eta 48 euro udalekuetan hamabost egunetan parte hartuko dutenentzat. Familia bereko hiru haur apuntatzen badira, kuotan %25eko deskontua egingo diete.
Ordainketak Euskadiko Kutxaren 3035 0125 60 1260044447 kontu korrontean egin behar dira, haurraren izen-abizenak zehaztuta. Ordainagiri hori aurkeztu behar da izena ematerakoan.
Begiraleen izen-ematea, epe berean
Begiraleentzako izen-ematea ere datorren astelehean irekiko dute eta 23ra arte egongo da zabalik. Udalekuetan lan egiteko interesa dutenek ere, Gazte Informazio Bulegotik pasatu behar dute: astelehenetik ostiralera 17:30etik 19:30era, eta larunbatetan 130etik 13:30era.
Udalak jakinarazi duenez, begiraleak aukeratzeko prozesuak bi fase izango ditu. Lehenengoa, teorikoa izango da. Bertan, euskara maila, aisialdiko tituluak, heziketarekin harreman duten ikasketak, esperientzia… baloratuko dituzte. Bigarrena, praktikoa izango da. Hori Abaraxka Udal Ludotekan egingo duten saio baten baloratuko dute.
Udako kirol eskaintzan, 11 kirol
Aurten, 11 kirolen artean aukeratu ahal izango dute 4-16 urteko haur eta gaztetxoek. Honakoak izango dira: igeriketa, padel, spinning, aerobik, dantza, lerro irristaketa, piraguismoa, arrauna, skate-a, BTT eta eskalada. Horietan, ekainetik abuztura aritu ahal izango dute animatzen direnek. Izen-ematea, berriz, maiatzaren 6an irekiko dute.
Udalak zehaztu duenez, kirol batzuk kiroldegian bertan egingo dituzte. Besteak, “eskualdeko elkarteekin batera antolatutakoak”, haien zentroetan egingo dituzte. Hala nola, piraguismoa, arrauna, skate-a eta BTT.
