San Juan baleontzia, Pasaiarako aukera
Donibaneko Bixi-Bixi elkarteak antolatuta, San Juan baleontziaren gaineko hitzaldia eman zuen atzo Ion Maiak, Donostia 2016 egitasmoaren izenean. Izan ere, 2016ko Europako Hiriburutzaren barruko egitasmoa da baleontzi hori bere osotasunean San Pedroko Ondartxon eraikitzea, Kanadatik ekarritako planoak eta agiriak baliatuz —bertako Red Bayn hondoratu zen baleontzia, 1565ean—. Albaola elkarteko kideak arduratuko dira baleontzia eraikitzeaz, baina egitasmoaren koordinazioa eta ardura Maiak darama. Hala, zumaiarrak nabarmendu zuen egitasmo hori burutzea “Pasaiarentzako aukera bat” dela, hainbat arrazoigatik.
Baleontzia egiteko lau faktorek bat egin dutela nabarmendu zuen Maiak: batetik, Albaolak badakiela gisa horretako lanak egiten; bestetik, Ondartxo gabe ezingo litzatekeela proiektua gauzatu; hirugarrenez, Donostia 2016 “ametsa” egin bihurtzeko bidea izango dela, eta azkenik, Kanadaren ikerketa eta elkarlana aipatu zituen: “Lau faktore horiek ez ute inoiz ere, orain bezala, bat egingo. Errepikaezina da hori. Orain da baleontzia berriz ere egiteko garaia”.
Hala, baleontzia Pasaiarentzako “aukera” dela esaterakoan, honakoak zehaztu zituen zumaiarrak: “Pasaia biziberritzeko bidean faktoreetako bat izan daiteke baleontzia egitea eta bertan gelditzea, ondarea utziko luke herrian. Gainera, lehen mailako kultur ekipamendua utziko luke, eta Donostia 2016ri ezinbesteko ekarpena egingo lioke”. Hala, Maiak nabarmendu zuen kultur hiriburutzaren barruko egitasmoek 2016a bukatzen denean jarraitzeko helburua dutela, eta horietatik “garrantzitsuenetakoa” dela baleontziarena: “Munduan ondoen ezagutzen den XVI. mendeko baleontzia da, Kanadako ondarean ikurtzat dute Euskal Herriko ontzi hori, eta gainera, euskaldunok dugun ikur ofizial bakarra da”.
Ondoko bideoan, Maiaren azalpen gehiago daude.
