Apirilaren 13an egingo dute hemezortzigarren Zuhaitz Eguna, lehena Berrotaran gabe
Iazko abenduaren 17an hil zen Gregorio Berrotaran, Hondarribiko Udaleko Landa Garapeneko zinegotzia. Joan den asteko osoko bilkuran Juan Luis Silanes eseri zen bere aulkian eta berak hartu du 2013ko Zuhaitz Eguna antolatzearen ardura. Horrela, bitan hartu du Artzukoaren zenaren testigua, nekazaritza arloko kargua betetzeaz gain, Berrotaranek abiatu baitzuen duela hemezortzi urte herrian jaiotako haur bakoitzeko arbola bat aldatzeko ekimena. Horregatik, aurtengo ekitaldia berezia izango da, ekimenaren sortzailea bertan izango ez den lehen aldiz izango baita.
Aurtengo ekitaldiari dagokionez, Silanesek azaldu du “Portomoko lurren inguruan” egingo dela: “Udaleko Landa Garapeneko departamentuak antolatuta, aurten 178 izango dira landatuko diren zuhaitzak, azken urteotako zifrarik handienetakoa. Bitxikeria bezala, esan jaiotako haurretatik horietatik 96 mutilak direla eta 82 neskak. Mutilen artean izenik ohikoenak Odei, Telmo eta Manex dira, eta nesken artean aldiz, Malen, Martina eta Elene”. Aurten lizarrak aldatuko dituztela argitu du Silanesek.
Iaz bezala, kotxez hurbiltzen direnek Oiamungo Gainan aparkatu beharko dute, 2012ko Zuhaitz Eguna egin zen lekutik oso gertu baitako aurtengoa egiteko aukeratutako lur eremua. “Ekitaldia goizeko 11.00tan hasiko da”, esan du Nekazaritzako zinegotziak. “Ordu horretan daude deituak 2012. urtean jaiotako haurrak eta bere guraso, anai-arreba eta senideak. Ordu bete beranduago, 2006. urtean jaiotako haurren ordua izango da, aurten 7 urte betetzeagatik makil bana oparituko zaie eta”, gehitu du landa garapeneko udal arduradun berriak.
