94 enpresa berri sortu dira Bidasoan
Joan den urteko lehen hiru hilabeteetan 94 enpresa berri sortu ziren Bidason, horietatik 25 merkataritzaren sektorekoak izan ziren. Datu horiek Miguel Angel Paez Bidasoa Bizirik garapen agentziako presidenteak eta Juan Mari Altuna presidenteordeak eman dituzte gaur.
Ekintzailetzari dagokionez, Bidasoa Bizirik-ek 425 enpresa proiekturen bideragarritasuna aztertu du, guztira, 440 ekintzailek aurkeztutakoak. Horietatik 110 bat proiektuk egin dute aurrera.
Garapen agentziak ekintzaileei espazio fisiko bat eskaintzen die euren proiektuak garatu ahal izateko. Lau enpresa zentro ditu Irun nahiz Hondarribian, eta 26 lokal. Horietatik hamasei daude beteta.
Paezen arabera, azpiegitura horiek ekonomia pizten ari dira, ekintza berriak sortzen ari direlako: “Horrek enplegua sortzen du, kopuru txikian bada ere, eta zentro bera izanda, enpresen arteko elkarlana sustatzen du”. Enpresa zentro horietan hiru urtez gera daitezke gehienez, eta merkatu librekoetan baino alokairu txikiagoa ordaindu behar izaten da, “batez beste 9 euro metro koadroko”, adierazi du Paezek.
