Larunbatean ongietorria egingo diote Asier Tapiari Xaian
Martxoaren 2an, larunbatarekin, ongietorri ekitaldia egingo diote Pausuko Xaia ostatuan, hilaren 23an aske gelditu zen Asier Tapia donostiarrari. 2007ko urrian atxilotu zuten Biriatun, Hendaian bizi zenean. 12:30ean egingo diote ongietorria eta ondoren bazkaria izango da.
Baltasar Garzon epailearen aginduz 2001ko martxoan atxilotu zuten Tapia lehen aldiz, gazte abertzaleen kontrako sarekada bat salatzeko emandako prentsaurrekoan mintzatu eta gero. Espetxeratu zuten, baina urte hartako urrian aske geratu zen.
2002Ko otsailean Jarrai-Haika-Segi auzian prozesatu zuten eta donostiarra ez zen epaiketara agertu eta bera bilatu eta atxilotzeko agindua eman zuen Garzonek. 2007Ko urrian atxilotu zuten Biriatu eta Hendaia arteko errepidean, gaztearen kontrako euroagindu bat betearaziz. Hendaian bizi zen Tapia eta bizitza publikoa egiten zuela adierazi zuen Askatasunak bere atxiloketa eta gero.
Larunbateko bazkarian izan nahi duenak aldez aurretik erretserba egin behar du, (0033) 559 20 76 10 telefonora deituta. Osteguna da izena emateko azken eguna. Bazkariaren prezioa 22 eurokoa da eta 8 eurokoa haurrentzat.
