Bejeta jantokia, bertako produktuez gozatzeko bazkariak
Aldatsa Baratza Kooperatibak ekimen berri bat jarriko du martxan: bejeta jantokia. Meaka auzoan duten baratzeko produktuekin prestatuko dute bazkaria hileko lehen larunbatetan; lehenengoa, baina, salbuespena izango da, hilaren 9an izango baita martxoko bejeta jantokia. Ekimen honen bidez euren baratza kooperatiba ezagutaraztea dute helburu.
Bazkariak Lakaxita gaztetxean izango dira, 14:00etatik aurrera. Lehenengo bazkariko menua zehaztu dute dagoeneko antolatzaileek: zizka mizkak, kalabaza purea, arroza curryarekin, kafea eta txupitoa. Txartelak 8 euroan daude salgai Lakaxita gaztetxean eta Kabigorri eta Sunbila tabernetan.
Barazkien ekoizpena eta banaketa
Aldatsa Baratza Kooperatiba Irungoa da, barazkien ekoizpena eta banaketa uztartzen dituena. Astean 20 saski banatzen dituzte hilabeteko kuota sistema baten bitartez eta bi liberatu dituzte baratza zaintzeko. Agroekologia sustatzeko ekimen gisa definitzen dute euren burua eta asanbladan oinarritzen direnak. Basherri taldeen sarean parte hartzen dute Gipuzkoa mailan.
