Irunek aukera bat galdu du, Eibarren puntu bakarra lortuta
Real Unionek aukera ona galdu zuen larunbatean play off postuetara hurbiltzeko, sailkapeneko laugarren tokian dagoen Eibarren kontra jokatu baitzuen. Bana berdindu zuten Eibarko Ipurua futbol zelaian. Inondik inora, etxekoak ziren gusturago epaileak partidaren amaiera seinalatu zuenean, irundarrekiko hamar puntuko aldeari eutsi baitiote. Zelaia oso egoera txarrean zegoen, erabat lokaztuta, eta baldintza horietan jokalariek ahal izan zutena egin zuten. Golak bigarren zatian iritsi ziren, biak penaltiz. Eibartarrak aurreratu ziren, bigarren zatiaren hasieran, Jitoren golari esker. 63.ean Angulok berdindu zuen eta hortik aurrera markagailua ez zen gehiago mugitu.
Unionek ez zuen emaitza ona lortu asteburuan, baina okerragoa ere izan zitekeen, igoera kanporaketa jokatzeko aukera ematen duten lau postuetatik azkena hamar puntura jarraitzen duelako, aurreko astelehenean bezala, irundarren berdindu duen Eibar delako laugarren postu horren jabe. Bi taldeen artean Barakaldo eta Lleida daude; biek irabazi dute asteburuan eta hori ez da albiste ona.
Behintzat, irundarren atzetik dauden bi taldeek, Logroñesek eta Tudelanok, biek ala biek galdu zuten, eta Unionen atzetik jarraituko dute beste astebetez, txuribeltzek haien arnasa kolkoan nabaritzen badute ere.
Real Unionek play offetan sartzeko aukera du, hamalau partida geratzen baitira liga erregularra bukatzeko. Nolanahi ere, gauzak asko aldatu behar dira, Batetik, irundarrek euren aurkariek baino hobeto egin behar dute, eta egin dezakete, baina bestetik, Eibarrek baino hamar puntu gehiago pilatu behar dituzte, eta hori ez da hain erraza, gutxiago asteburuan galdutako aukera galduta.
