Enplegua bilatzeko tresnak erakutsiko dituzte El Espazion
Hilabete honetan enplegu bilaketa “eraginkorra” izan dadin laguntzeko hainbat tailer jarriko dituzte El Espazion. Horretarako, mailingak egiteko enpresa zerrenda nola lortu eta enplegu bilaketa nola antolatu eta planifikatu erakutsiko dute, besteak beste.
Bidasoa Bizirik-etik adierazi dutenez, El Espaziok bi gunetan jarri du interes berezia. Batetik, enplegu eskaintza gehien dituzten lanbideei buruzko jardunaldiak eta tailerrak garatzeko gaian, eta bestetik, enplegua atzerrian bilatzean. Lehenengoari dagokionez, Ezagutu itzazu etorkizuneko lanbideak izena eman diote tailerrari eta horren barruan hainbat lanbide landuko dituzte parte hartzaileek: komertziala, nekazaritza ekologikoa, mugikorretarako aplikazioen programatzailea eta Community manayer, besteen artean.
Atzerrian enplegua bilatzeari dagokionez, berriz, tailer jakin bat emango dute; curriculuma eta aurkezpen gutuna frantsesez egiteko tailerra, hain zuzen ere.
Hurrengo hilabeteetan egingo diren tailerrak ezagutzeko eta informazio gehiago eskuratzeko sartu www.elespazio.com webgunean edo 943 63 31 60 telefono zenbakira.
