Mailari eusteko giltza Leonen izango du Hondarribia-Irunek
Emakumeen Ligan jokatzen duen Hondarribia-Irun saskibaloi taldeak ezin izan zuen SPAR UniGironaren aurka irabazi Hondartza kiroldegian larunbatean jokatutako partidan. Azken emaitzak erakusten duen bezala (42-49), ez zen partida ona izan, eta akats gutxiago egin zituenak lortu zuen garaipena.
Anne Peñaren nesken artean bost jokalarik soilik sartu zituzten puntuak eta, horrela, zaila da irabaztea, aurkariak puntu gutxi eginda ere.
Sonia Borges portugaldarrak beste egun beltz bat izan zuen eta -6ko balorazioarekin bukatu zuen partida, 13 minututan saskiratu gabe (0/6 bikoetan eta hiru errebote). Taldeko onena Tatiana Kehsler txiletarra izan zen, 16ko balorazioarekin, hamazazpi puntu sartu eta bederatzi errebote harrapatuta.
Asteburuan dena dago jokoan
Larunbatean etxean galdu eta gero, heldu den asteburuan azkenaren kiroldegia bisitatuko du Hondarribia-Irunek eta, bertan, Emakumeen Ligan beste urtebetez jarraitzeko txartela lor dezake. Liga amaitzeko lau partidaren faltan Leongo Bembibrek hiru garaipen ditu eta Hondarribia-Irunek bost.
Leonen irabazita, hiru partidako aldea izango lukete hondarribitarrek, eta elkarren arteko average-a alde. Aurten ligan 11 talde besterik ez daudenez eta bakarra jaitsiko denez, Hondarribia matematikoki salbatuta legoke. Larunbatean izango da partida, 18:15ean, Bembibreko udal kiroldegian.
