Lortutako lan baldintzak defendatzeko, bi orduko lanuztea egingo dute portuan
Pasaiako Portu Agintaritzako Langile Batzordeak bi orduko lanuztea egingo du bihar. Estatuko gainontzeko portu agintaritzetan dago deituta deialdia eta Pasaiako zein Bilboko portuetako langileei lanuztean parte hartzeko dei egin die batzordeak. Lanuztearen bidez 2010eko maiatza bitarte lortutako lan baldintzak defendatu nahi dituzte, “%5a itzultzea, aparteko sariei eustea, laudoa betetzea, adostutako lan egutegia, kontratazioak eta langileen funtsa sozialaren %100a, besteak beste”.
Horrez gain, Bilbo eta Pasaiako portuen kudeaketa eta jabegoa euskal instituzioen eskura pasatzea eskatuko dute eta Euskal Autonomia Erkidegoaren barruan dauden portuetako langileak lan-hitzarmen berean biltzea.
Biharko lanuztearekin, bestalde, Pasaiako portuarentzat bideragarritasun plana eskatuko dute langileek, “non lanpostuak bermatuta geldituko diren eta komertzio jarduera indarberritzeko neurriak hartuko diren”.
Erantzun bateratua
Pasaiako Portu Agintaritzako Langile Batzordeak “datorren uztailaren 8an lan-hitzarmenaren urltraaktibitatea indargabetzeko auziaren aurrean, Madrilgo gobernuaren dekretuei erantzun bateratua emateko beharra” ikusten du. Oso larritzat jotzen du lan erregulaziorik gabe gelditzearen arriskua, “hori baita erreformen helburua”.
