Ander Palavecino eta Asier Sagasti Espainiako sambo txapeldun
Ama Guadalupekoa Judo taldeko Ander Palavecino eta Asier Sagasti hondarribiarrek urrezko domina lortu zuten asteburuan Asturiasen jokatu den Espainiako Sambo Txapelketan.
Palavecinok etxean jokatzen zuen Jorge Ignacio Escandon garaitu zuen -57 kiloetako finalean. Escandon, Oscar Fernandez klubeko kidea da, taldekako garaipena lortu zuenekoa, alegia. Ama Guadalupekoa bigarren geratu zen taldeka. Guztira, hamazazpi taldek parte hartu dute Senior Mailako Espainiako Sambo Txapelketan.
Sagasti, bere aldetik, 90 kiloetako pisuan igo zen podioko goiko koskara, eta Palavecinok bezala, Oscar Fernandez taldeko ordezkari bat menderatu zuen azken lehian, Borja Gonzalez.
Hondarribiko beste bi kirolarik, Esteban Martinezek eta Asier Bargallok brontzezko domina bana lortu zituzten, 74 eta 82 kiloetan hurrenez hurren.
Nesketan, Amaya Curiel izan zen Euskal Federazioko eta Hondaribiko taldeko partaide bakarra Asturiasen. Zilarrezko domina lortu zuen bere pisuan, -64 kiloetan.
Gazte mailan hamabi domina
Espainiako Sambo Txapelketako helduen probak igandean izan ziren. Aurretik, larunbatean, gazteak borrokatu ziren. Hondarribitarrek hamabi domina lortu zituzten Gazte Mailan, bederatzi mutiletan eta beste hiru nesketan. Kontuan izan behar da Ama Guadalupekoako kirolari gehienak ez dutela samboa egiten, judoa baizik, eta sambo borroka baliatzen dutela euren judo teknika aberasteko.
Aritz Sagarzazu (-60 kilo), Iker Otegi (-65) eta Rodrigo Montoya (-81) Espainiako txapeldun geratu ziren; Mario Diaz (-52) eta Alberto Mitxelena (-56) bigarren geratu ziren; eta Iñaki Lekuona (-52), Iosu Olmos (-60), Jose Angel Domez (-65) eta Fermin Balda (-70) hirugarren.
Emakumeetan partaidetza txikiagoa izan zen. Bi taldek hartu zuten parte bakarrik, Ama Guadalupekoak eta Valentziako Morvedrek. Hondarribiko taldeko hiru ordezkariek urrea lortu zuten: Amets Sarasua lezoarrak (-70 kilo), Nekane Quiñonesek (-75) eta Lidia Yarzak (+75), eta taldekako garaipena eman zioten Ama Guadalupekoari.
