Ipuinak eta txotxongiloak izango dira Errenteriako Inauterietan
Inauterietako egitarauaren barruan, Kimutx proiektuaren aurkezpena sartu dute. Igandean izango da, 17:00etan lehenengo saioa, eta 18:00etan bigarrena. Kanta, ipuin eta marrazkien bidez, Euskal Herriko mitologian ezagunak diren izakiei buruzko istorioak kontatuko dituztela jakinarazi dute antolatzaileek. Kimutx bera iratxo bat da, “basoan bizitzea, kantatzea eta jolastea maite duena”. Sarrera doan da, eta lehenengo saio hasi baino ordubete lehenago lortu ahal izango dira Xenpelar Etxean bertan (saioa bakoitzeko 50 sarrera banatuko dituzte). Ekimena 0-8 urteko haurrei zuzendua dago. Antolatzaileen arabera, saio bakoitzak 20 minutu iraungo ditu.
Irune Balentziaga Kultura zinegotziak azaldu duenez, auzolanean sortutako proiektua da, eta webgune bat ere martxan jarri dute, www.kimutx.eu. Bertan, hainbat ipuin, kanta eta jolas jarri dituzte herritarren eskura. Errenteriako Udalak ere Haur Hezkuntzako geletan banatzeko ehun ale eskuratuko ditu, eta jakinarazi duenez, “ikastetxe eta haur eskolek otsailean jasoko dute material hori”.
