Eguraldi txarra izan arren, Ihoteak ospatzen ari dira Oiartzunen
Atzo hasi ziren Oiartzungo Inauteriak, Ihoteak, ospatzen. Jai giroan, Zukgua prozesuan parte hartzen ari diren gazteek poteoa egin zuten lehenengo, zakuz jantzita eta prozesuari buruzko kartelekin. 19:00etan Azeri Dantza egin eta sorgin dantza egin zituzten herriko dantzariek. Gero, intxixuak eta sorginak jaitsi ziren menditik, euria lagun, asteburua herritarrekin pasatzera.
Gaur, kuestazioaren eguna da. Eguraldia txarra izan arren, auzoz auzo atera dira hainbat herritar, puskak biltzera.
Arratsaldean, 18:00etan, auzoetan ibilitako koadrila guztiak elkartuko dira plazan, jai giroan. Horrez gain, 22:30ean kontzertuak izango dira Kataxulo Gaztetxian.
Bihar, intxixuek eta sorginek agur esango diete oiartzuarrei. Baina gauza gehiago ere izango dira:
- 09:00etan. Diana Lartaungo txistulariekin.
- 11:30ean. Haur kalejira. Elizaldeko gurasoak eta ikasleak, karroza eta guzti aterako dira ikastetxetik, eta plazara joango dira, Belutenetik pasatuta.
- 12:30ean. Mutxikoak plazan.
- 17:00etan. Haur jolasak.
- 19:00etan. Intxixu eta sorginei agurra.
- Ondoren. Suzko akerra.
