Hilaren 27an San Mamesera joateko bidaia antolatu du Peña Athleticek
Hondarribiko Athletic futbol taldearen zaleek hilaren 27an San Mamesera joateko bidaia antolatu dute, egun horretan gaueko bederatzietan Bilboko Athleticek eta Atletico Madrilek jokatuko dute partida ikusteko. Partida horretarako sarrerak lortu dituzte eta interesaturik daudenek Lagunak tabernan izena eman behar dute. Peñako bazkideek 30 euro ordaindu behar dute eta bazkide ez direnek 75. Athleticaren zaleen taldetik esan dutenez, “jende gutxi apuntatzen bada, bidaia bertan behera utziko dugu eta martxoaren 10ean Valentziaren aurka eskatuko ditugu sarrerak”.
Gainera, Gabonetan bufanda bat egin dutela jakinarazi dute, “gure taldearen eta Euskal Herriaren koloreak uztartzen dituena”. Taldeko bazkide bakoitzarentzat bufanda bat egin dute dohainik, eta besteren bat nahi duenak 15 euroan eros dezake. Bufandan, ‘Peña Athletic Hondarribia’ testua ageri da.
