Etorkizuneko Oiartzun nolakoa izango den aztertuko dute
Hirigintza Aholku Kontseiluak Planeamendua lantzeko saio berezi bat egingo du datorren asteartean (hilak 22), udaletxeko areto nagusian, 18:00etan. Auzoak, mugikortasuna eta ekipamendu sarean dauden alternatiba ezberdinak zeintzuk diren mahai gainean jarri eta horiek aztertuko dituzte. Azken saioa izango da asteartekoa; orain arte Hiri Antolaketarako Plan Orokorraren aurrerapena lantzeko zazpi saio egin dituzte.
Herritarren iritzia behar bezala jasotzeko (saioa irekia da), saiora hurbiltzen direnak lan-taldetan jarriko dituzte eta beraiekin batera izango dira udal ordezkari politikoak, teknikoak eta Hiri Antolaketarako Plan Orokorraren aurrerapena idatzi duen talde teknikoko kideak. Saioak hiru ordu iraungo du.
Parte hartzearen garrantzia
Udalak aitortu duenez, planeamendua gai konplikatua suertatzen da herritarrentzat, “baina oso garrantzitsua da. Izan ere, planeamenduak definituko du etorkizuneko Oiartzun nolakoa izango den, zein eremu jarraituko den, nola haziko den eta behar dituen azpiegiturak, besteak beste. Bide horretatik, eta gaiak duen garrantzia kontuan izanda, oiartzuarrek udal kontuetan ere parte hartzeari inportantzia handia ematen dio udalak: “Parte hartzea termino errealetan ulertzen du gobernu taldeak. Hori ahalbidetzeko, ezinbestekoa da udalaren aldetik herritarrei parte hartzeko tresnak eta baliabideak jartzea, eta parte hartzearekin kultura bultzatzeko hezkuntza lana egitea”.