Urarekin zeuden arazoak eten dira momentuz
Eguerdian atertzera egin du, eta urarekin zeuden arazoak eten egin dira momentuz. Lartzabal auzoan Oiartzun ibaia atera egin da, baina orain maila zertxobait jaitsi egin da, eta parkea eta kantxa jada ez daude urez beteta. Hori bai, uholdeen arrastoak geratzen dira, eta putzu handiak daude Fanderian, Lartzabalerako bidean.
Goizean zehar euria bota eta bota ibili da, eta Oarsoaldean zein Bidasoan zenbait arazo izan dira, batik bat, Errenteria-Oreretan, Oiartzun ibaia atera denean.
Orain eguraldiak lasaitzera egin duen arren, alerta laranja emanda du Segurtasun Sailak, eta 80 litro egin ditzake metro koadroko. Era berean, itsasgora arratsaldean izango da.
