Etxe kaleratzeen aurrean, irtenbideak bilatzeko eskatu dio alkateari PSE-EEk
Alokairua ezin zutela ordaindu eta kalean geratu diren bi familietako zortzi kideen egoerari “irtenbidea” bilatzeko eskatu dio Ainhoa Zabalo alkateari, Lezoko PSE-EEko bozeramaile eta zinegotzi bakarra den Mikel Arrizabalagak. Komunikabideetara helarazitako oharrean harridura azaldu du Arrizabalagak, gainera “udalerriko Gizarte Zerbitzuetan ez dutelako halako muturreko egoera antzeman eta Aldundiak zein Eusko Jaurlaritzak larrialdi egoeretan ematen dituen dirulaguntzak jasotzera ez dituztelako bideratu”. Horrenbestez, bi familia horiek udalaren jabetzakoak diren pisuetan hartzeko eta kaleratzeei aurre egiteko protokoloa abiatzeko eskatu dio Udalari Arrizabalagak, “jendea ezin dugulako kalean utzi”.
