Herri lasterketarako izena eman daiteke oraindik
Herri bilguneak eta herriko kirolari talde batek antolatu dute, preso eta iheslarien egoera salatzeko Oraindik izena emateko aukera dago Herrira-k eta herriko kirolari talde batek hilaren 30erako antolatutako herri lasterketan. 170 pertsonek eman dute izena oraingoz, eta gutxienez 200 apuntatzea da helburua. Horregatik, herritarrei eta inguruko herrietako bizilagunei deia egin diete parte hartzeko. Zerrendak herriko tabernetan eta kiroldegian egongo dira igandera arte, eta edonork parte har dezake: haur, gazte edo heldu izan. Izan ere, «preso eta iheslarien egoera salatzea da asmoa, eta eurei elkartasuna adieraztea». Beraz, ez da korrikalaria izan beharrik parte hartzeko. Norberak bere erritmora sala dezake presoen egoera. Izena emateko interesa duten helduek 6 euro oraindu behar dituzte kamisetarekin korri egin nahi izanez gero. Bestela, bi euro. Igandea baino lehen izena ematen dutenek ziurtatuta izango dute kamiseta, baina ondoren apuntatzen direnei ez diete bermatzen izango dutenik. Egunean bertan ere izango da izena emateko aukera, lasterketa baino lehen plazara agertuta. 1.200 kilometrora Helduek egin beharreko ibilbidea 6,5 kilometrokoa da: 12:00etan plazatik atera, Fortalezara joan, Altzibar, Iturriotz eta Ugaldetxo pasatu, Tolaitara igo, Belutenera iritsi, eta plazara itzuli. Antolatzaileek jakinarazi dutenez, herriko presoak 1.200 kilometrora daude, eta 200 pertsonek 6,5 kilometro eginez gero, 1.200 kilometro pasatxo izango lirateke: «Presoengandik bereizten gaituzten [...]
Herri bilguneak eta herriko kirolari talde batek antolatu dute, preso eta iheslarien egoera salatzeko
Oraindik izena emateko aukera dago Herrira-k eta herriko kirolari talde batek hilaren 30erako antolatutako herri lasterketan. 170 pertsonek eman dute izena oraingoz, eta gutxienez 200 apuntatzea da helburua. Horregatik, herritarrei eta inguruko herrietako bizilagunei deia egin diete parte hartzeko.
Zerrendak herriko tabernetan eta kiroldegian egongo dira igandera arte, eta edonork parte har dezake: haur, gazte edo heldu izan. Izan ere, «preso eta iheslarien egoera salatzea da asmoa, eta eurei elkartasuna adieraztea». Beraz, ez da korrikalaria izan beharrik parte hartzeko. Norberak bere erritmora sala dezake presoen egoera.
Izena emateko interesa duten helduek 6 euro oraindu behar dituzte kamisetarekin korri egin nahi izanez gero. Bestela, bi euro. Igandea baino lehen izena ematen dutenek ziurtatuta izango dute kamiseta, baina ondoren apuntatzen direnei ez diete bermatzen izango dutenik. Egunean bertan ere izango da izena emateko aukera, lasterketa baino lehen plazara agertuta.
Antolatzaileek inguruko herrietakoei parte hartzeko deia egin diete.
1.200 kilometrora
Helduek egin beharreko ibilbidea 6,5 kilometrokoa da: 12:00etan plazatik atera, Fortalezara joan, Altzibar, Iturriotz eta Ugaldetxo pasatu, Tolaitara igo, Belutenera iritsi, eta plazara itzuli. Antolatzaileek jakinarazi dutenez, herriko presoak 1.200 kilometrora daude, eta 200 pertsonek 6,5 kilometro eginez gero, 1.200 kilometro pasatxo izango lirateke: «Presoengandik bereizten gaituzten kilometro horiek egin eta hurbiltzeko keinua egitea da asmoa».
Ondoren, zer jan eta edan egongo da korrikalarientzat. Amazkar tabernak salda eskainiko du, eta pintxoak eta edaria ere izango dira. Eta sariak ere bai: txapela bana jasoko duten lehen neskak eta lehen mutilak.
Haur eta gaztetxoen lasterketa 11:30ean aterako da plazatik. Landetxera joan, eta txokolategiko kaletik itzuli beharko dute horiek. 9 urtetik beherakoek buelta bat emango dute, eta gorakoek bi. Talde honetan parte hartuko dutenek ez dute izena ematerakoan ordaindu beharrik, ezta aurrez izena eman beharrik ere. Egunean bertan azaltzearekin nahikoa da. Ondoren, txokolatea eta bizkotxoa izango dituzte.
Herriko kirolarien helburua lasterketa urtero egitea da, «dispertsioa dagoen bitartean, salatzeko». Urteko azkeneko igandean izango da.
Gabonetako ekimenak
Herrira-k, beste hainbat elkartasun ekimen ere antolatu ditu Gabonetarako (behean). Gaur egingo dute lehena.
Egitaraua
- Gaur, hilak 21. Elkarretaratzea kantuz, 20:00etan, Alcampon.
- Astelehena, hilak 24. 17:00etan, Hator-Hator neska-mutil herrira. Kantari, auzoz auzo.
- Ostirala, hilak 28. Hileko azken ostirala. Berezia izango da.
- Igandea, hilak 30. I. Herrira Herri Lasterketa.
- Astelehena, hilak 31. Urte bukaera ospatzeko ekitaldi berezia, 19:30ean, plazan.
