16 milioi euroko kontuak onartu dituzte, kontrako bozkarik gabe
Hondarribiko Udalbatzak 2013 urteko aurrekontua onartu zuen atzo goizean egindako osoko bilkuran. 16.098.119 euroko kontuak onartu zituzten, eta udal talde guztiek alde bozkatu zuten, Bilduk ezik —abstenitu egin zen—. Aitor Kerejeta alkateak kontuak eztabaidatzeko bileretan jasotako ekarpenak eskertu zituen, eta bilera horietan “denen lehen helburua ongizatea izan dela” nabarmendu zuen. Zerbitzuen atala ere aipatu zuen alkateak, “lanpostuak mantentzeko eta ekonomia sortzeko” bide bezala. Diru sarrerei buruz, Kerejetak azaldu zuen “oso zuhurrak” izan direla, eta gogorarazi zuen “tasak eta zergak urtero %2,5 igo direla, baina bizitza askoz gehiago garestitu dela”. Udalak 2013an lanerako hiru ardatz nagusi izango ditu, alkatearen arabera: 50 urte baino gehiagoko etxeetan egin beharreko azterketak, Muliaten beste 75 etxebizitza eraikitzeko proposamena, eta Zubieta-Urdanibia eremua. Azken hori “mugitzeko” beharra azaldu zuen, “beste erakundeek gauza bera egiteko asmoa agertu dutelako”. Astean zehar udal gobernua oposizioarekin elkartu da eta hasierako proposamenean hainbat aldaketak adostu dituzte. Hala, osoko zuzenketak ez ziren aurkeztu, eta hiru taldek bakarrik aurkeztu zituzten emendakin partzialak. Horietatik hamar onartu zituzten, sei Bildurenak, hiru PSE-EErenak eta Hamaikabatek aurkeztutako bakarra. Adostasun handia Aurrena sozialisten udal taldeak aurkeztutako bederatzi emendakinak eztabaidatu zituzten, “epe motzeko beharrak betetzeko proposamenak”, Iosu Alvarezen esanetan. 100.000 euroko bi partida proposatu zituzten, bat enplegua sustatzeko eta beste [...]
Hondarribiko Udalbatzak 2013 urteko aurrekontua onartu zuen atzo goizean egindako osoko bilkuran. 16.098.119 euroko kontuak onartu zituzten, eta udal talde guztiek alde bozkatu zuten, Bilduk ezik —abstenitu egin zen—. Aitor Kerejeta alkateak kontuak eztabaidatzeko bileretan jasotako ekarpenak eskertu zituen, eta bilera horietan “denen lehen helburua ongizatea izan dela” nabarmendu zuen. Zerbitzuen atala ere aipatu zuen alkateak, “lanpostuak mantentzeko eta ekonomia sortzeko” bide bezala.
Diru sarrerei buruz, Kerejetak azaldu zuen “oso zuhurrak” izan direla, eta gogorarazi zuen “tasak eta zergak urtero %2,5 igo direla, baina bizitza askoz gehiago garestitu dela”. Udalak 2013an lanerako hiru ardatz nagusi izango ditu, alkatearen arabera: 50 urte baino gehiagoko etxeetan egin beharreko azterketak, Muliaten beste 75 etxebizitza eraikitzeko proposamena, eta Zubieta-Urdanibia eremua. Azken hori “mugitzeko” beharra azaldu zuen, “beste erakundeek gauza bera egiteko asmoa agertu dutelako”.
Astean zehar udal gobernua oposizioarekin elkartu da eta hasierako proposamenean hainbat aldaketak adostu dituzte. Hala, osoko zuzenketak ez ziren aurkeztu, eta hiru taldek bakarrik aurkeztu zituzten emendakin partzialak. Horietatik hamar onartu zituzten, sei Bildurenak, hiru PSE-EErenak eta Hamaikabatek aurkeztutako bakarra.
Adostasun handia
Aurrena sozialisten udal taldeak aurkeztutako bederatzi emendakinak eztabaidatu zituzten, “epe motzeko beharrak betetzeko proposamenak”, Iosu Alvarezen esanetan. 100.000 euroko bi partida proposatu zituzten, bat enplegua sustatzeko eta beste bat laguntza sozialetarako. Enplegua sortzeko emendakina onartu zuten aho batez —Bilduk gai beraren inguruan zuena erretiratuta—, eta zuzenki enplegua sortzera bideratzeko konpromisoa hartu zuten.
Gizarte laguntzena ere atera zen, baina 100.000 euro beharrean 25.000 eurokoa; izan ere, urtarrilean kaleratzeen gaia landuko dute, Stop Kaleratzeak taldekoekin elkartu eta gero, eta etxerik gabe gera daitezkeen familientzat beste diru kopuru bat jartzea aztertuko dute orduan.
Sozialisten ekimenez ere, Alde Zaharrean eta Portuan 50 urte baino gehiago dituzten etxeetan azterketak egiteko 60.000 euro bideratzea onartu zuten. Aldiz, Ekialdebuseko lineak pasatzen ez diren auzoetan garraio publikoa behar ote den aztertzeko emendakina ez zuten onartu. PSE-EEk lau emendakin erretiratu zituen, aurrekontuetan antzerako partidak agertzen direlako.
Hamaikabatek aurkeztutako emendakin partzial bakarra ere onartu zuten, 1638ko setioan irlandarrek izan zuten parte hartzea lantzen duen ingelesezko liburu bat itzultzeko diru laguntza jasotzen zuena.
Bildukoak pozik
Oposizioko lehen udal taldeak 22 emendakin aurkeztu zituen atzoko plenoan. Sei aho batez onartu zituzten, eta beste bederatzi erretiratu zituen koalizioak, batzuk PSE-EEk aurkeztutakoen antzerakoak zirelako, eta besteak, gobernuaren proposamenean helburu bereko partidak zeudelako.
Amuten kultur ekintzak burutzeko 2.000 euro, auzo horretako egoitzarako 6.000, San Marko parkea egokitzeko 2.000, edota auzoko jaiak antolatzen dituzten lau elkarteentzako 10.000 jasoko ditu aurrekontuak, Bilduren ekimenez. Emekik antolatutako Hiri Debekatuaren Mapan zehaztutako puntu ilunak zuzentzeko 3.000 euro onartu zituzten ere. Gobernutik azaldu zuten azken partida horretarako ohiko gastuetako partida erabili daitekeela, baina Ibai Labaienek argudiatu zuen hobe zela partida berri bat, “udalak arlo horretan konpromisoa duela argi gera dadin”.
Aldiz, Bilduren zenbait emendakin ez ziren atera, hala nola, Alde Zaharrerako larrialdi plan bat egin, auzo horretan motoak aparkatzeko leku estali bat jarri, edota Nestor Basterretxearen eskultura bat erosteko eskaerak.
Emendakinak eta gero, aurrekontuak bozkatu zituzten eta erabateko gehiengoz onartu zituzten 2013ko kontuak, EAJ, PSE-EE, PP eta H1!-n bozekin. Bildu abstenitu egin zen, baina «pozik» agertu zen Labaien, euren emendakin asko onartu zirelako.
Beste gaiak
Atzoko gai nagusia aurrekontuena izan zen, baina beste gai txiki batzuk onartu zituzten urteko azken bilkuran. Besteak beste, Euskal Herriko Pintxo Txapelketarako aldundiak emandako diru laguntza Hondarribiko Ostalaritza Elkarteari bideratzea eta Estatuko eta Eusko Jaurlaritzaren administrazioekin Erregistro Bakarrerako Lankidetza Hitzarmenak eguneratzea onartu zuten aho batez. Gabarrari kalea berriritartu eta zenbait bidegorri zati egiteko esleipena ere erabaki zuten atzoko plenoan.
Eta bilkura bukatu aurretik Bilduko Juanito Ortizek galdera egin zion alkateari, Erdi Aroko Hiribilduen Sareak itzuli beharreko diruaz. Hondarribia, sareko partaide da, eta erakundeak urteko ekintzetarako dirua izan dezan udalak 250.000 euro aurreratu zituen, sareko beste hiri batzuek dirurik ez zutelako. Diru hori aurten bertan itzuli behar zuten, baina oraindik ez dute egin. Ortiz kexu agertu zen: “Basterretxearen eskultura ezin da jarri dirurik ez dagoelako, eta beste herri batzuei kopuru hori utzi eta ez zaie itzultzeko eskatu”.
Gai batzuk urtarrilerako
Atzoko plenoan bazituzten beste gai batzuk lantzeko, baina atzeratu dituzte, hala nola, Stop Kaleratzeak-ek etxegabetzeen aurrean neurriak eskatzen dituen mozioa, eta Bilduk aurkeztutako beste bi, bat Palestinaren ingurukoa, eta beste bat herriko bi familiak jaso dituzten mezu arrazisten aurrean lerrokatzea eskatzen zuena. Gai horiek 2013ko urtarrileko osoko bilkurarako gorde dituzte, batzordean landu eta gerorako.
