Kaiko Herrera ingurua berregituratzeko ardatza izatea eskatu dute La Herrera, Herrirak eta Harripek
Gaur eguerdian 200 bat lagun inguru bildu dira Trintxerpeko Gudarien Enparantzaren eta Herrerako Topo geltoki berriaren arteko bidea lotzeko. Euren asmoa, geltoki berrira joateko dauden irisgarritasun arazoak salatzea, eta Kaiko Herrera Antolatzeko Pro...
Gaur eguerdian 200 bat lagun inguru bildu dira Trintxerpeko Gudarien Enparantzaren eta Herrerako Topo geltoki berriaren arteko bidea lotzeko. Euren asmoa, geltoki berrira joateko dauden irisgarritasun arazoak salatzea, eta Kaiko Herrera Antolatzeko Proposamena aurrera eramateko eskatzea. Gainera, eremu hori inguruaren ardatz eskatu dute La Herrera, Herrira Batzordeak eta Harripe Altza eta Herrerako auzo elkarteak.
Topoko geltoki berriaren parean manifestua irakurri dute batzordearen eta auzo elkartearen izenean. Deialdira egiteko manifestuan adierazi zutenaz gain, Kaiko Herreraren eremua berreskuratzea ekiteko eskatu eta exijitu dute: “Herritarren proposamenean jasotzen den moduan, oraintxe bertan has dadin hau egituratuko duen ardatz bilakatzen, zentraltasun ardatz, Herreratik hasi eta itsasorainoko hiri espazio libreen eremu, azken batean, inguruko merkataritza eta ekonomiaren garapenaren ardatz”. Horrela, gogorarazi dute Pasaiak duela Gipuzkoako langabezia tasarik altuena.
Horrela, erakundeei “lardaskeriak eta adabakiak” alde batera uzteko eskatu diete, eta “zentzugabekeria horrek ematen digun indarra” erabiltzea baliatuko dutela esan dute, “guztien artean gure etorkizunerako espazioak berreskuratzen” hasteko.
Erakundeei deialdi bikoitza egin diete, halaber, Harripek eta La Herrera, Herrirak. Alde batetik, 2009an hasitako prozesuari jarraipena emateko (Antolatzeko Proposamena), eta oztoprik ez jartzeko. Bestetik, topoaren sarbide “duina” egiteko, eta inguruan ardatz izango den ekonomia eta gizarte ardatza denen artean eraikitzea exijitu dute.
