Xabier Portugal eta Altamira Puenteren izena eramango du aurrerantzean Pasaia Hiria olerki lehiaketak
Ekhine Egiguren Azkune eta Aitor Albistur Pulido izan dira aurtengo euskarazko irabazleak, eta Elena Roman Torres eta Luis Garcia Perez, gaztelerazkoak. Ekhine Egiguren Hirigrafiak eta Paisaiagramak lanarengatik saritu dute, eta Aitor Albistur, berriz,...
Ekhine Egiguren Azkune eta Aitor Albistur Pulido izan dira aurtengo euskarazko irabazleak, eta Elena Roman Torres eta Luis Garcia Perez, gaztelerazkoak. Ekhine Egiguren Hirigrafiak eta Paisaiagramak lanarengatik saritu dute, eta Aitor Albistur, berriz, Sonetoen Erresumatik lanarengatik. Gazteleraz, Elena Romanek Hogares de paso lanarekin lortu du lehen saria, eta Luis Garciak Entre la luz y el barro lanarekin.
Atzo aurkeztu zituzten, Trintxerpeko udal liburutegian, Pasaia Hiria 16. olerki lehiaketan saritutako poemategiak jasotzen dituzten liburuak. Felix Marañak gidatu zuen aurkezpena, eta haren ondoan izan ziren Euskara eta Kultura zinegotzi Amaia Esnarriaga eta euskarazko lanen bi sortzaileak.
Marañak iragarri zuenez, aurrerantzean, lehiaketak, Xabier Portugal izena eramango du euskarazko adarrean, eta gaztelerazkoak aldiz, Altamira Puenterena. Altamira Puente olerki lehiaketaren sortzailea izan zen Antxoko liburuzaina zela, eta zendutako Xabeir Portugal, berriz, lehiaketako sustatzaile nagusia, idazle, zinegotzi zein alkate izan zen bitartean. Horregatik erabaki dute antolatzaileek lehiaketak aurrerantzean beren izenak eramatea.
Pasaia Horia olerki lehiaketak sustrai sakonak ditu. Hiru hamarkadatan zehar biziraun du eta bilduma argitaratutako 24 olerki liburu bildu dituzte.
