Oarsoaldeko kirol eskaintza eskuorri batean bildu dute
Oarsoaldeko haurrentzako kirol eskaintza eskuorri batean bildu dute lehen aldiz eskualdeko lau udalek. Bertan, Errenteria-Oreretako Fanderia nahiz Galtzaraborda, Lezoko Bekoerrota zein Altzate, Oiartzungo Elorsoro eta Pasaiako kiroldegietan haurrei zuz...
Oarsoaldeko haurrentzako kirol eskaintza eskuorri batean bildu dute lehen aldiz eskualdeko lau udalek. Bertan, Errenteria-Oreretako Fanderia nahiz Galtzaraborda, Lezoko Bekoerrota zein Altzate, Oiartzungo Elorsoro eta Pasaiako kiroldegietan haurrei zuzenduta dauden kirol ekintzak agertzen dira, alboko herrien eskaintzaren berri izateko.
Guztira, 6.800 eskuorri atera dituzte. Herri bakoitzean toki batean jarri dituzte eskuorriak, baina, oro har, kiroldegian, postontzian edota ikastetxean hartu ahal izango dute interesdunek.
Kiroldegian egiteko ekintzei dagokionez, tenisa, padela, igeriketa… egin ahal izango dute.
Kiroldegitik kanpo ere badago aukera: piraguismoa, arrauna, skatea eta BTT. Guztiak animatu dituzte parte hartzera. Izena emateko kiroldegitik pasatu behar da.
Igerilekuen kanpaina
Martxoan eskualdeko igerilekuak erabiltzeko martxan jarritako proba pilotua, berriz, gaur bukatuko da. Horrenbestez, ostiraletik aurrera, abonatuek beren herriko igerilekua soilik erabili ahal izango dute. Irailetik aurrera berriro aztertuko dute abonatu guztiek lau udalerrietako udal igerilekuak erabiltzeko aukera.
