Denek busti nahi izan dute
Hiru urteko lanen ondoren inauguratu dute San Juan-Etxeandia eremu berria. Eguraldiak bat ere lagundu ez duen arren, dozenaka elkartek parte hartu dute plaza berriaren ongietorri ekitaldian Kristauen liburu sakratuak dio San Juan hasi zela basamortuan bataioak egiten 28. urtean; Kristoren jarraitzaile izan nahi zuten judutarrak Jordan ibaiaren uretan murgiltzen zituen. Horregatik Juan bataiatzailea esaten zioten, eta Nazareteko Jesus bera ere baiatatu zuela dio Itun Berriak. Mundu osoan zientoka dira santuari eskainitako tenplu, monumentu eta abarrak. Irunen ere plaza handi bat dago San Juanen izenarekin. Hiru urteko lanen ostean eraldatuta dago, eta Etxeandiakoarekin elkartuta hiri eremu zabal bat osatzen du. Lanak bukatuta, asteburuan San Juan plaza berriaren bataiatze herrikoia egin zuten. Palestinako Jesusena bezala, bataiatze handia behar zuen izan astebururako Irunen iragarrita zegoena. Epe luzeko lanen ondoren, San Juan eta Etxeandia plazen bateratzeak utzi duen hiri eremu berriari ongietorria emateko, hiriko dozenaka elkartek egiten dakitena erakutsi nahi zuten bertan. Hura bezala, uretan murgildutakoa izan zen Irungo plaza berriaren bataioa, baina ez euriak, ezta haizeak ere, ezerk ere ez zuen San Juan plaza berriko inaugurazio festa zapuztu. Bota eta bota aritu da asteburu osoan, zeruko ur hodiak lehertu izan balira bezala. Une batzuetan, larunbat arratsean eta igande eguerdian batez ere, irundarrei Sodoma [...]
Irudian, Ametsa abesbatzaren saioa, igande eguerdiko zaparradaren unean
Hiru urteko lanen ondoren inauguratu dute San Juan-Etxeandia eremu berria. Eguraldiak bat ere lagundu ez duen arren, dozenaka elkartek parte hartu dute plaza berriaren ongietorri ekitaldian
Kristauen liburu sakratuak dio San Juan hasi zela basamortuan bataioak egiten 28. urtean; Kristoren jarraitzaile izan nahi zuten judutarrak Jordan ibaiaren uretan murgiltzen zituen. Horregatik Juan bataiatzailea esaten zioten, eta Nazareteko Jesus bera ere baiatatu zuela dio Itun Berriak. Mundu osoan zientoka dira santuari eskainitako tenplu, monumentu eta abarrak. Irunen ere plaza handi bat dago San Juanen izenarekin. Hiru urteko lanen ostean eraldatuta dago, eta Etxeandiakoarekin elkartuta hiri eremu zabal bat osatzen du. Lanak bukatuta, asteburuan San Juan plaza berriaren bataiatze herrikoia egin zuten.
Palestinako Jesusena bezala, bataiatze handia behar zuen izan astebururako Irunen iragarrita zegoena. Epe luzeko lanen ondoren, San Juan eta Etxeandia plazen bateratzeak utzi duen hiri eremu berriari ongietorria emateko, hiriko dozenaka elkartek egiten dakitena erakutsi nahi zuten bertan. Hura bezala, uretan murgildutakoa izan zen Irungo plaza berriaren bataioa, baina ez euriak, ezta haizeak ere, ezerk ere ez zuen San Juan plaza berriko inaugurazio festa zapuztu.
Bota eta bota aritu da asteburu osoan, zeruko ur hodiak lehertu izan balira bezala. Une batzuetan, larunbat arratsean eta igande eguerdian batez ere, irundarrei Sodoma eta Gomorrakoen bekatuak ordainarazi behar zizkietela zirudien. Bertakoek San Juan Harriari begiratzen zioten, botatzen ari zena geratzeko asmorik ez ote zuen galdezka edo. Eta ez; euria ez zen geratu, baina irundarrak ere ez. Denek parte hartu nahi zuten hiriko erdiguneko eremu berriari eginiko herri ongietorrian.
1.400 lagun, luntxerako
Parcour-ra eta trialsina izan ezik, San Juan plazaren inauguraziorako prestatutako ekitaldi guztiak egin zituzten: plazan, pergolan, bideetan, agertokian… Haurrentzako tailer eta ekitaldi guztiak gainezka egon ziren, eta gazteek ere erantzun ona eman zioten koadrilen olinpiadari; zortzi taldek parte hartu zuten. Larunbateko luntxean 1.400 paella eta patata tortila razio banatu zituzten, eta udaletxean, ia 400 lagunek bisitatu zuten San Juanen historia iruditan erakusketa. Etabar, etabar, etabar: 200 txirrindulari Indoor Zikloan, ehundaka dantzari eta dozenaka abeslari hainbat saiotan…
Plaza inauguratu dute, baina amaitu gabe ireki dute. Makinak behin-behinean erretiratu dituzte. Krisia dela eta, proiektuaren zati handi bat egin gabe geratu da (hotela, liburutegi berria, udal bulegok eta auditorioa); udal kutxaren egoera aldatzen denean eramango dituzte makinak berriro hara. Proiektua osatu bitartean, plaza inauguratuta dago, eta estreinatuta. Laster lehen aldiz goraino betetzeko aukera izango dute irundarrek, sanmartzialetako egun handian.
