Pontikako lurzoruko kutsadura maila aztertuko dute
Pontikako ibarreko lurzoruko kutsadura maila aztertzeko lanak hasiko ditu Errenteriako Udalak, Jose Manuel Ferradas Ingurumen eta Mendi zinegotziak jakinarazi duenez. Horren harira, egun degradatuta eta lurperatuta dagoen Mastiko ubidearen leheneratzea aurreikusi dutela gaineratu du ingurumen zinegotziak. Ikerketa gauzatzeko, Ondoan enpresarekin 34.000 euroko kontratua sinatu zuen udalak hilabete hasieran. Eusko Jaurlaritzaren diru laguntza jasoko du ekimen hori burutzeko, eta enpresak, berriz, lau hilabeteko epea izango du lan horiek egiteko. Zundaketa eta laginketak Pontikako ibarraren azterketa historikoa, ingurune fisikoaren ikerketa, plangintza analitikoa duen laginketa estrategia, jasotako emaitzen balorazioa eta arriskuen analisia egingo ditu Ondoan enpresak. Halaber, bost metroko sakonerako zundaketa mekanikoak, piezometroak, eta lurzoruaren, hondakinen eta uraren laginketak egingo dituzte Pontikan, bere garaian bertan zegoen industriak kutsadura eragin ote zuen zehazte aldera. “Baliteke konposatu kutsatzaileak azaltzea azterketa horietan: metal astunak, kloratutako disolbatzaileak, olio mineralak, zianuroak edota PCBak”, zehaztu du Ferradasek. Izan ere, ingurune horretan 1858. urteaz geroztik ehun-gaien akabera eta larrua lantzen zuten Lucas Gamon eta Arizmendi Hermanos enpresak aritu ziren lanean, hurrenez hurren. 1889. urtean, berriz, Fabril Lanera SA enpresa hasi zen ehun-gaien akabera lanetan, 1975. urtean itxi zuten arte. Aintzinean padura izandakoan, berriz, metalaren sektoreko Gecotor enpresa aritu zen lanean. Azterketa lanak bukatuta, Pontikako lurzoruan legezko mugak gainditzen dituzten kutsadura [...]
Pontikako ibarreko lurzoruko kutsadura maila aztertzeko lanak hasiko ditu Errenteriako Udalak, Jose Manuel Ferradas Ingurumen eta Mendi zinegotziak jakinarazi duenez. Horren harira, egun degradatuta eta lurperatuta dagoen Mastiko ubidearen leheneratzea aurreikusi dutela gaineratu du ingurumen zinegotziak.
Ikerketa gauzatzeko, Ondoan enpresarekin 34.000 euroko kontratua sinatu zuen udalak hilabete hasieran. Eusko Jaurlaritzaren diru laguntza jasoko du ekimen hori burutzeko, eta enpresak, berriz, lau hilabeteko epea izango du lan horiek egiteko.
Zundaketa eta laginketak
Pontikako ibarraren azterketa historikoa, ingurune fisikoaren ikerketa, plangintza analitikoa duen laginketa estrategia, jasotako emaitzen balorazioa eta arriskuen analisia egingo ditu Ondoan enpresak.
Halaber, bost metroko sakonerako zundaketa mekanikoak, piezometroak, eta lurzoruaren, hondakinen eta uraren laginketak egingo dituzte Pontikan, bere garaian bertan zegoen industriak kutsadura eragin ote zuen zehazte aldera. “Baliteke konposatu kutsatzaileak azaltzea azterketa horietan: metal astunak, kloratutako disolbatzaileak, olio mineralak, zianuroak edota PCBak”, zehaztu du Ferradasek.
Izan ere, ingurune horretan 1858. urteaz geroztik ehun-gaien akabera eta larrua lantzen zuten Lucas Gamon eta Arizmendi Hermanos enpresak aritu ziren lanean, hurrenez hurren. 1889. urtean, berriz, Fabril Lanera SA enpresa hasi zen ehun-gaien akabera lanetan, 1975. urtean itxi zuten arte. Aintzinean padura izandakoan, berriz, metalaren sektoreko Gecotor enpresa aritu zen lanean.
Azterketa lanak bukatuta, Pontikako lurzoruan legezko mugak gainditzen dituzten kutsadura kontzentrazioak atzemanez gero, udalak “ikerketa zehatza” egingo duela azaldu du Ferradasek, “Pontikako ibarrean kutsadura guztia kentzeko”.
Udalak, Pontikako Auzo Elkarteri, Ingurumen Aholku Batzordeari zein talde ekologistei hartutako erabakiaren eta eman beharreko urrats guztien gaineko informazioa emango diela azaldu du Ferradasek.
Lehentasuna
“Bioaniztasunaren zaintza, energia, jasangarritasuna eta parte hartze publikoa eta hondakinen prebentzioa” udal ingurumen politikaren lehentasun direla gogorarazi du Ferradasek, eta Pontikako ibarrekoa, “lehentasun” horien barruko ekimena dela gaineratu du.
