San Tomas Batzordea: “Elkarlanaren emaitza izango da biharko azoka”
Inoiz baino herritar gehiago aritu da azokaren eta San Tomas Egunaren prestaketa lanetan. Horregatik, argi du San Tomas Batzordeak biharkoa “elkarlanaren emaitza” izango dela. Gogoeta horrekin aurkeztu zuen joan den larunbatean San Tomas Batzordeak udalerrian erreferente bihurtu den eguna. Hala, biharkoa, azken urteotako azokarik “ikusgarriena” izango dela esateko zalantzarik ez zuen izan, gainera. Norbanako boluntarioak, txosna batzordea, Xenpelar AEK Euskaltegia eta Errenteriako Udala aritu dira buru-belarri antolaketa lanetan, eta lortutako elkarlan esparruaz “harro” azaldu dira batzordeko kideak: “Zinez uste dugu herrigintzarako bidea horixe dela”. Horrekin batera, batzordeak urratutako bidea “eredu” izan daitekeela nabarmendu du, “herrigintzan eta jaien antolakuntzan elkarlanean aritu daitekeela adierazteko”. Hogei baserritar eta artisau Goizeko hamarretan zabalduko dute azoka, eta antolatzaileek jakinarazi dutenez, hogei baserritar eta artisautik gora izango dira produktuak erakutsi eta saltzen. Besteak beste, hestebeteak, euskal pastelak, gaztak, turroiak, Tolosako babarrunak, lore eta landareak, barazkiak, xaboiak, larrua, zilarra, lurrinak, zura, ardoa, olioa eta ukenduak erosterik izango dute azokara bertaratzen direnek. Horrekin batera zazpi txistorra postu jarriko dituzte parte hartuko duten taldeek Herriko Plazan, Zumardi Txikian eta Biteri kalean: Koldo Mitxelenak, Oiartzok, Ereintzak, Gaztelanek, Sputnikek, Telleri konpartsak eta Touringek, hain zuzen ere. San Tomas Batzordeak ere jarriko du kantina, eta azken hori, Zumardian bertan egongo da. Urtero [...]
Inoiz baino herritar gehiago aritu da azokaren eta San Tomas Egunaren prestaketa lanetan. Horregatik, argi du San Tomas Batzordeak biharkoa “elkarlanaren emaitza” izango dela. Gogoeta horrekin aurkeztu zuen joan den larunbatean San Tomas Batzordeak udalerrian erreferente bihurtu den eguna. Hala, biharkoa, azken urteotako azokarik “ikusgarriena” izango dela esateko zalantzarik ez zuen izan, gainera.
Norbanako boluntarioak, txosna batzordea, Xenpelar AEK Euskaltegia eta Errenteriako Udala aritu dira buru-belarri antolaketa lanetan, eta lortutako elkarlan esparruaz “harro” azaldu dira batzordeko kideak: “Zinez uste dugu herrigintzarako bidea horixe dela”. Horrekin batera, batzordeak urratutako bidea “eredu” izan daitekeela nabarmendu du, “herrigintzan eta jaien antolakuntzan elkarlanean aritu daitekeela adierazteko”.
Hogei baserritar eta artisau
Goizeko hamarretan zabalduko dute azoka, eta antolatzaileek jakinarazi dutenez, hogei baserritar eta artisautik gora izango dira produktuak erakutsi eta saltzen. Besteak beste, hestebeteak, euskal pastelak, gaztak, turroiak, Tolosako babarrunak, lore eta landareak, barazkiak, xaboiak, larrua, zilarra, lurrinak, zura, ardoa, olioa eta ukenduak erosterik izango dute azokara bertaratzen direnek.
Horrekin batera zazpi txistorra postu jarriko dituzte parte hartuko duten taldeek Herriko Plazan, Zumardi Txikian eta Biteri kalean: Koldo Mitxelenak, Oiartzok, Ereintzak, Gaztelanek, Sputnikek, Telleri konpartsak eta Touringek, hain zuzen ere. San Tomas Batzordeak ere jarriko du kantina, eta azken hori, Zumardian bertan egongo da.
Urtero moduan, animaliak ere izango dira azokan txikienentzako gozagarri. Hala, Agirre Lehendakariaren plazan oiloak, kapoiak, ahuntzak, untxiak, ardiak, indioilarrak eta akuaiak izango dira, besteak beste.
Egitaraua
Ikusi eta jatekoekin batera, egitarau oparoa antolatu du San Tomas Batzordeak biharko. Goizez, txistulariak ibiliko dira herriko kaleetan, eta Zumardian pregoia irakurri ostean, bertsolariek hartuko dute txanda oholtzaren gainean. 13:00etan, berriz, herri kirolen txanda helduko da. Ernesto Ezpeleta Bihurri-k herri kirolen erakustaldia egingo du. Arratsaldean, berriz, dultzaineroek, mutxiko dantzaldiak eta trikitilariek girotuko dituzte bazterrak.
San Tomas eguneko protagonistak ere ez du hutsik egingo. Aurtengoan, Palote izena jarri diote txerriari: “Batzordekide baten izena jarriko geniola adostu genuen, egindako lanaren aitortza egiteko”.
Egunean bertan zozkatuko duten saskiaren irabazlea eta salmenta eta txistorra postu ederrena aukeratuta amaituko da San Tomas Azoka 19:30ean.
