"Eraginkortasunaren alde", ordezkari aldaketa San Markon
Ainhoa Intxaurrandieta Lezoko Bilduko zinegotzia da San Marko Mankomunitateko presidente berria, Beñat Amenabarren ordez. Pasa den astelehenean egindako batzarrean hartu zuten erabaki hori, eta lehendakariordea aldatzea ere proposatu zuten.
Bilduk du gehiengoa Mankomunitatean, eta bertako ordezkariek azaldu dutenez, aldaketa hori “eraginkortasunaren alde” egin dute. Izan ere, orain arteko zuzendaritzako kideen egoera pertsonalak “lan handi hori aurrera eramaten ez du utziko”. Bilduko ordezkarien esanetan, Mankomunitateak aurrera eraman nahi dituen lan ildoak “indartu” nahi dituzte izendapen berri horrekin. Horrela, udalen eta mankomunitatearen arteko elkarlana bultzatzen “buru belarri” ariko da zuzendaritza berria.
“Irtenbide sostengarriak”
Hondakinen kudeaketan duten lan ildoa sakontzen jarraituko dutela adierazi dute, “gai horri dagozkion irtenbideak ingurumena, osasuna eta baliabide ekonomikoak xahutu gane eginez”. Gaineratu dutenez, irtenbide horiek “sostenigarriak” eta “kutsadura gutxitzen dutenak” izango direla jakinarazi dute. Bide horretan, gaikako bilketa bultzatu behar dela uste dute, “birziklaezinak diren hondakinak gutxiago izan daitezen ahalbidetzeko”.
Parte hartzerako deia
Azkenik, Mankomunitateak deia egin die herritar guztiei, baita gipuzkoarrei ere: “Orain arte lan itzela egin dugu hondakinen kudeaketan, baina denen parte hartze arduratsu baten bitartez lor dezakegu konponbidean aurrera pausuak ematea, lurraldearen etorkizuna, ingurumena, osasuna eta ekonomia baldintzatu gabe”.
