Arteando, erreferente izateko
Egungo arte plastikoak mota guztietako publikoarengana, bildumagileengana eta arte zaleengana hurbiltzeko, Arteando arte garaikidearen azokaren lehen ekitaldia antolaru dute Irunen. Galiziako Espacio Atlantico erakusketaren antolatzaileek ekarri dute Irunera azoka, eta hilaren 21etik 26ra egingo dute, Ficoba erakustazokan. 24 galeriarentzako lekua izango du, 150 artisten lanak bilduko dituzte eta beste bost gela Project rooms bezala egokituko dituzte. Joan den ostiralean Ignacio Scarpellini ekimeneko zuzendariak, Irun, Hondarribia eta Hendaiako alkateek eta Kutxa Fundazioko zuzendari Carlos Ruizek hedabideen aurrean aurkeztu zuten Ficoban Arteando. Vigon (Pontevedra, Galizia) egiten den Espacio Atlanticoko ordezkari Ignacio Scarpellini da Arteando azokaren lehen ekitaldiaren zuzendaria. Madrilgo ARCOren atzetik, arloko azoka handiena da Vigokoa, eta bide berbera jarraitu nahi dute Arteandon. Pozik zegoen ostiralean azokaren zuzendaria eskualdean jasotako harreragatik, eta eskerrak eman zizkien aurkezpenean egon ziren guztiei. Arteandoren lehen ekitaldia, «izango dena baino zerbait handiagoa» izatea nahi zuela onartu zuen Scarpellinik, «baina txikitik hastea ere ondo dago, gerora hazteko». Aurreratu zuen «azoka gizartearentzat pentsatuta» dagoela: «Bizi gaitezen alai. Horretarako da artea, pozik bizitzeko». Lekurik aproposena Jose Antonio Santano Irungo alkatearen ustez, Arteandok bi ezaugarri nagusi ditu: ekimen kulturala dela, eta aktibitate ekonomikoari lotuta dagoela. Bere ustez, erakunde publikoek kultur ekitaldiak babesteko irizpidea indartu beharko lukete, «jarduera ekonomikoarekin harremana duelako arteak, [...]
Antolatzaileek onartu dute izango dena baino askoz azoka handiagoa antolatu nahi zutela. |asier perez-karkamo|
Egungo arte plastikoak mota guztietako publikoarengana, bildumagileengana eta arte zaleengana hurbiltzeko, Arteando arte garaikidearen azokaren lehen ekitaldia antolaru dute Irunen. Galiziako Espacio Atlantico erakusketaren antolatzaileek ekarri dute Irunera azoka, eta hilaren 21etik 26ra egingo dute, Ficoba erakustazokan. 24 galeriarentzako lekua izango du, 150 artisten lanak bilduko dituzte eta beste bost gela Project rooms bezala egokituko dituzte.
Joan den ostiralean Ignacio Scarpellini ekimeneko zuzendariak, Irun, Hondarribia eta Hendaiako alkateek eta Kutxa Fundazioko zuzendari Carlos Ruizek hedabideen aurrean aurkeztu zuten Ficoban Arteando.
Vigon (Pontevedra, Galizia) egiten den Espacio Atlanticoko ordezkari Ignacio Scarpellini da Arteando azokaren lehen ekitaldiaren zuzendaria. Madrilgo ARCOren atzetik, arloko azoka handiena da Vigokoa, eta bide berbera jarraitu nahi dute Arteandon.
Pozik zegoen ostiralean azokaren zuzendaria eskualdean jasotako harreragatik, eta eskerrak eman zizkien aurkezpenean egon ziren guztiei.
Arteandoren lehen ekitaldia, «izango dena baino zerbait handiagoa» izatea nahi zuela onartu zuen Scarpellinik, «baina txikitik hastea ere ondo dago, gerora hazteko». Aurreratu zuen «azoka gizartearentzat pentsatuta» dagoela: «Bizi gaitezen alai. Horretarako da artea, pozik bizitzeko».
Lekurik aproposena
Jose Antonio Santano Irungo alkatearen ustez, Arteandok bi ezaugarri nagusi ditu: ekimen kulturala dela, eta aktibitate ekonomikoari lotuta dagoela. Bere ustez, erakunde publikoek kultur ekitaldiak babesteko irizpidea indartu beharko lukete, «jarduera ekonomikoarekin harremana duelako arteak, eta beraz, herrientzako onuragarria delako. Arteando existituko ez balitz, sortu beharko genuke», gehitu zuen. Santanorentzat, Arteandok «artearen adierazteko modu ezberdinak publiko arruntari hurbiltzeko» balioko du.
Jean-Baptiste Salaberri Hendaiako auzapezarentzat egitasmoa «eskualdearentzako oso interesgarria» da. Aldi berean, azoka hasi arteko egunak «jakin-min handiarekin» biziko dituela azaldu zuen Etxeberrik: «Scarpelliniren grina ezagututa, ziur ondo aterako dela dena».
Hondarribiko alkateak eskerrak eman zizkion Scarpelliniri Arteando antolatzeko eskualdea hautatu izanagatik. «Hondarribian goi mailako artistak daude», esan zuen Aitor Kerejetak, «oinarria badago, baina ezagunak izateko hori ez da nahikoa, baliabideak jarri behar dira, eta Ficoba baliabide egokia da».
Bildumazaletasuna herritartu
Carlos Ruiz Kutxa Fundazioko zuzendariak «Txingudirekiko konpromisoa» berretsi zuen, eta bere erakundeak «Ficoba erakustazoka balorean jartzeko edozein ekimen» bultzatuko duela zehaztu zuen. ARCO arte azokara antolatzen ziren «peregrinazioak» gogora ekarri zituen Ruizek: «Beste batzuek Bidasora peregrinatuko dute orain». Kutxako mandatariak aurreikusi zuen Irungo arte garaikideko azokak bildumazaletasuna «herritartzeko» balioko duela, «elitetik ateratzeko».
