Jangeletako langileek grebari eutsiko diote datorren astean
Eskola publikoetako jangelak kudeatzen dituzten enpresen “immobilismoaren” aurka, jangeletako langileek azken bi asteetan egin duten greba datorren astera ere luzatzea erabaki dute. “Helburuak bete arte” greban segitzeko asmoa agertu dute.
Eskola jangeletako gatazkak hartu duen norabidea ikusita, EHIGE Euskal Herriko Ikasleen Gurasoen Elkarteak astelehen eta astearterako mobilizazioetara deitu du Bizkai eta Gipuzkoako ikastetxeetan, “gurasoen kezka azaltzeko eta eskola jantokien gatazka konpon dadin eskatzeko”.
2010eko irailetik “eskola jantokien zerbitzua hobetzeko” familiek egunero 30 zentimo gehiago ordaintzen dituztela ekarri du gogora EHIGEk: “Langileen aldarrikapenetako bat, hain zuzen. Baina gainontzeko puntuak konpontzea ez dago gure esku. Hori dela eta, gatazka behin betiko konpontzeko eskatzen diegu aldeei”.
Hitzarmena ez bada sinatzen, neurri hori atzera botatzeko eskatuko dute gurasoek: “Aldeekin hitz egin ondoren, jangelako kuota handitzeko Eusko Jaurlaritzarekin batera hartutako erabakia berraztertzea planteatuko dugu, eta, ondorioz, dirua bueltatzea familiei”.
Langileek salatu dute lanaldiak —bi ordu eta erdikoa gehienez— ez diela betebeharrak txukun egiteko modurik ematen, eta gero eta haur gehiagoren ardura dutela. Hori dela eta, lanaldia luzatzea eta prestakuntza handiagoa jasotzea eskatu dute. Jaurlaritzaren iritziz, ordea, enpresak prest azaldu dira lanaldia hemezortzi ordu luzatzeko.
