Idurre Bera: «Guztion parte-hartzearekin kontatutako istorioa izan behar du argazki artxiboak»
Udalaren aspaldiko asmoa da herriko argazki artxiboa osatzea. Horretan dagoeneko zebiltzan herritarrekin harremanetan jarri eta bat etorri ziren bi aldeen asmoak iazko udaberrian. Elkarlana erraza izan dela nabarmendu du Idurre Bera (Oiartzun, 1979) Kultura zinegotziak, eta herritarrek ere oso ondo hartu dutela proiektua eta kolaboratzen ari direla. Abendura arte udaletxean ikus daitekeen erakusketaren berri ere eman du. Argazki zaharren erakusketa osatu duzue. Zer bildu duzue bertan? Herriko argazki artxiboa osatzeko lehen fasean bildutako 1.500 argazkietatik 200 inguru bildu ditugu erakusketarako. Lehen fasean kultura gaiak jorratu ditugunez, kultura gaiak ikusi ahal izango dituzte bisitariek: jaiak, ospakizunak, garai bateko erromeriak, prozesioak… Kronologikoki antolatuta daude, urtarrilaren 1etik abenduaren 31ra arte. Horietako ospakizun batzuk egun mantentzen dira, baina beste batzuk galdu egin dira. Garrantzia berezia dute horiek, oiartzuar batzuk ez dituztelako bizi. Modu horretan, agian, batzuk berreskuratzeko lana egin dezakegu. Zein urtetatik aurrera bildu dituzue argazkiak? Orain arte lortu den argazki zaharrena 1900 urtekoa da. Hala ere, gehienak 36ko Gerra ondorengoak dira. Erakusketa, aipatu duzuenez, kritika egiteko ere izango da. Alegia, erakusketak aukera emango du herritarren iritziak biltzeko eta herritarrek proiektuan kolaboratzeko. Herri ondarea biltzeko helburua du argazki artxiboak. Herri honen historia jasoko dugu irudietan. Horretarako auzoetako elkarteen laguntza behar dugu, argazki asko baitituzte. [...]
Udalaren aspaldiko asmoa da herriko argazki artxiboa osatzea. Horretan dagoeneko zebiltzan herritarrekin harremanetan jarri eta bat etorri ziren bi aldeen asmoak iazko udaberrian. Elkarlana erraza izan dela nabarmendu du Idurre Bera (Oiartzun, 1979) Kultura zinegotziak, eta herritarrek ere oso ondo hartu dutela proiektua eta kolaboratzen ari direla. Abendura arte udaletxean ikus daitekeen erakusketaren berri ere eman du.
Argazki zaharren erakusketa osatu duzue. Zer bildu duzue bertan?
Herriko argazki artxiboa osatzeko lehen fasean bildutako 1.500 argazkietatik 200 inguru bildu ditugu erakusketarako. Lehen fasean kultura gaiak jorratu ditugunez, kultura gaiak ikusi ahal izango dituzte bisitariek: jaiak, ospakizunak, garai bateko erromeriak, prozesioak… Kronologikoki antolatuta daude, urtarrilaren 1etik abenduaren 31ra arte. Horietako ospakizun batzuk egun mantentzen dira, baina beste batzuk galdu egin dira. Garrantzia berezia dute horiek, oiartzuar batzuk ez dituztelako bizi. Modu horretan, agian, batzuk berreskuratzeko lana egin dezakegu.
Zein urtetatik aurrera bildu dituzue argazkiak?
Orain arte lortu den argazki zaharrena 1900 urtekoa da. Hala ere, gehienak 36ko Gerra ondorengoak dira.
Erakusketa, aipatu duzuenez, kritika egiteko ere izango da. Alegia, erakusketak aukera emango du herritarren iritziak biltzeko eta herritarrek proiektuan kolaboratzeko.
Herri ondarea biltzeko helburua du argazki artxiboak. Herri honen historia jasoko dugu irudietan. Horretarako auzoetako elkarteen laguntza behar dugu, argazki asko baitituzte. Norbanakoen laguntza ere beharrezkoa da. Batzuek, argazki artxibo handiak izaten dituzte etxean. Gehienak identifikatuta daude eta kolaboratzen dute. Baina badaude pertsona batzuk, agian sekulako argazki sorta ez dutenak, baina argazki puntual garrantzitsuak gordetzen dituztenak. Argazki batzuk badaudela ez dakigu. Edo badaudela badakigu, baina ez nork dituen. Jendearen parte-hartzea oso garrantzitsua da proiektu honetan, guztion parte-hartzearekin kontatutako istorioa izan behar duelako artxiboak. Ezin du izan gutxi batzuen argazkiekin kontatutako istorioa, ahalik eta zabalena izan behar du, eta erakusketak ere horretarako aukera ematen du.
Nola kolaboratu daiteke?
Udaletxeko areto nagusian, erakusketan, egongo den pertsonari helarazi behar dizkiete datuak herritarrek. Akaso ez da egongo pertsona bat une oro, baina bestela Kultura zerbitzura jo dezakete. Iñaki Arbelaitz eta Eneko Salaberria artxiboan lanean ari dira eta ezagutzen dituzte herritar gehienek. Eurengana ere jo dezakete.
Bigarren fasean lanean hasiko zarete berehala. Noizko buka dezakezuela uste duzue?
Zaila da esatea. Aurreikuspenak egiten ditugu, baina lanean ari zarela aukera berriak agertzen dira. Luzatzen joaten da proiektua eta alde positiboa badu horrek, baina bukaera atzeratu egiten da. 2011 urtean zehar jarraituko dugu bigarren fasearekin eta ea zer ematen duen. Hala ere, bukatzen ez den lana behar du izan. 2012rako gehiena bilduta eta ikusteko moduan egongo dela uste dugu, baina etengabe lanean jarraitzea da asmoa. Tarteka bada ere, argazki gehiago agertuko dira, ziur. Eta, gainera, hain zaharrak ez diren argazkiak ere bilduko ditugu, horiek ere gure historiaren parte baitira. Etengabe artxiboa berritzen joatea da asmoa.
Lehenego faseko argazkiak noiz egongo dira ikusteko moduan?
Urte berriarekin ikusteko moduan jartzea da asmoa. Data atzeratzen bada, gehiegi ez izatea espero dugu.
Beste webgune batean egongo dira argazkiak, baina oiartzun.org webgunean lotura egongo da, ezta?
Eusko Ikaskuntzarekin, Euskomediaren barruan elkarlanean aritu gara Euskal Herriko herrietako argazki artxiboak osatzeko proiektuan. Hala, euren webgunean jarriko ditugu argazkiak. Baina Udalaren webgunetik lotura egongo da, noski. Webgune propioa egiteko ideia buruan izan genuen, baina ez da hain erraza, eta beste artxiboak dauden foro zabalagoa egonda, Oiartzungo argazkiak bertan egotea garrantzitsua iruditu zaigu. Oiartzun, webgune horretan egotea garrantzitsua iruditu zaigu.
