Gogorrena espero dute
Azken asteetako ekaitzek eta astebururako iragarpenak asko zailduko dute Talaia Trail. Igandean egingo dute, eta lokatza izango da protagonista.
Asteartean aurkeztu zuten Talaia Trail 2018 Hondarribiko udaletxean
Oliveri 2016ko proban, Guadalupeko jaitsieran. Aurten zati arriskutsua izango da
Talaia iruditan
Itsasoaren gainetik
Munduan gutxi dira itsaso gainetik egiten diren lasterketak, Talaia Trail horietako bat. Korrikalariek Ulia jaisten dutenean, motora hartu behar izaten dute Pasai San Pedrotik Donibanera pasatzeko. Hori izaten dute atseden hartzeko une bakarra.
Lokatza, epaile
Gune arriskutsu bat baino gehiago zeharkatu beharko dituzte kirolariek, horietako bat Guadalupetik beherako malda (irudian, Joxe Amunarriz, 2016an). Oso lohitua egongo da eta gehiegi arriskatzen duenak, irabazi baino gehiago gal dezake.
Helmuga. Iristea da saria
Batzuek sailkapena, beste batzuek denbora. Bakoitzak bere helburua izango du, baina Kale Nagusia jaitsi eta Damarriko bihurgunea hartzen dutenean, txapeldun sentituko dira parte hartzaile guztiak. Hanketako mina ere joango zaie azken metroetan.
Talaia Trail 2018
Datuak
- Luzera. 30,8 kilometro.
- Goranzko desnibela. 1.300 m.
- Parte hartzaile kopurua. 500; 464 gizon eta 36 emakume.
- Irteera. 09:30ean, Donostiako Katalunia plazatik.
- Helmuga. Hondarribiko Harresilanda kalean.
Iazko Podioa
Mutilak- Iker Oliveri (2:19:05).
- Jon Ugalde (2:22:18).
- Aritz Kortabarria (2:22:27).
- Uxoa Irigoien (2:51:36).
- Emma Puchu (3:05:32).
- Karla Lejarreta (3:07:44).
Joxe Amunarriz: «Negu guztia prestatzen aritu naiz udaberriko karrera hauek ondo egiteko»
Duela bi urte bigarren geratu zen —iaz ez zuen parte hartu—, 2015eko denbora hiru minututan onduz. Urte gutxi daramatza mendiko lasterketen zirkuituan, baina urtetik urtera azkarrago ibiltzen da. Pasa den asteburuan Jurramendin podioa egitetik dator, eta Jaizkibelgo lokatz guneetan murgiltzen ohitua dago, bertan entrenatzen baitu. Igandean gutxik disfrutatuko dute, baina Joxe Amunarriz hondarribiarrak horietako bat izan nahi du. Horrez gain, ohorezko postuetako bat lortzera aterako da.
Nolako proba da Talaia zuretzat? Zer garrantzia du zure egutegian?
Batetik, 30 kilometroko mendi kostaldeko karrera dela esan behar da. Oso entretenigarria da, Donostiatik atera eta Uliako bideak zeharkatu eta Pasaiako badiara iritsi eta gero, San Pedrotik Donibanera barkuan pasatu behar izaten dugulako. Geroago Jaizkibel kostako bideetatik gure herrira.
Entrenatzen dudan eremuan denez, eta martxoan izaten denez, gustuko dudan proba da Talaia, eta nire prestakuntzara ondo egokitzen da, geroxeago maiatzean Zegamako Maratoia egiteko.
Nola iritsi zara aurten Talaiara?
Negu guztia prestatzen aritu naiz udaberriko karrera hauek ondo egiteko. Orain arte Lezo-Jaizkibelen eta Jurramendin egon naiz, nire nibela atera dut eta kontent nago.
Aste osorako eta astebururako eguraldi iragarpenak kontuan izanik, zer moduz ibiltzea espero duzu?
Neguan eguraldi txarra egin du eta horrela segitzea espero da Talaiari begira. Gustuko dut eguraldi hau, finean kondizio hauetan entrenatzen dugulako.
Zer plan duzu aste honetan prestatzeko? [Elkarrizketa asteartekoa da]
Aurreko asteburuan Jurramendin korritu nuen —hirugarren geratu zen— eta egun hauetan suabe entrenatuko dut Talaiara berriz ere fuerte iristeko.
Orain arteko probetako sailkapenaren arabera, zeintzuk izan daitezke hautagaiak mutilen podiorako?
Arerio nagusia Oliveri herrikidea izango dela uste dut, beti txapeldun geratzen da hemen eta Gipuzkoako karreretan. Eta nola ez, Jon Ugalderekin adi egon beharko naiz, Talaia bideko beste klasiko bat da. Ni saiatuko naiz nire lana egiten, hor goian beraiekin borrokatzeko.
Edurne Jauregi: «Eguraldia ikusita, ondo iristea izango da nire helburua»
Duela sei bat urte hasi zen korrika egiten Edurne Jauregi antxotarra, zaletasunez. Normalean asfalto gainean aritzen da, oso gutxitan mendian, hamar lasterketatik batean edo. Baina Talaia bidekoa lehen aldiz egin zuenetik bere proba gogokoenetako bat bilakatu da, nahiz eta teknikoegia dela onartzen duen. Igandean disfrutatzera aterako da, eta jaitsieretan arreta berezia jarri beharko du, ez erortzeko.
Nolakoa da zuretzat Talaia?
Niretzat lasterketa ikaragarria da. Erronka handia, mendian 30 kilometro egitea ez delako nolanahikoa. Bestetik, gure herrien inguruan egiten da, paisaia ederren inguruan, eta horregatik ere mendiko lasterketa izugarri ederra dela uste dut.
Zein denboran egin izan duzu?
Aurten parte hartuko dudan hirugarren ekitaldia da. Lehenean, 2014an, lau ordu inguruko denbora egin nuen, eta bigarrenean, 2016an, hiru ordu eta 40 minutura jaitsi nuen nire denbora. Aurten gustatuko litzaidake hiru ordu eta erdian-edo egitea, eta ahal izango banu, hortik beherago egon.
Azken egunetako eguraldia ikusita, nolako lasterketa espero duzu?
Zaila. Ni batez ere asfaltoko lasterketetan aritzen naiz, mendian gutxiago. Korritzeko zaila izango da, oso teknikoa, eta aitortu behar dut ibilbide teknikoetan ez naizela oso abila. Lokatz asko egongo da bidean, Jaizkibelen batez ere, eta arrisku puntua ere izango du. Jaitsieretan kontuz ibili beharko da; ondo jaisten direnek errazago izango dute zirkuitura moldatzea. Gainera, nire aurretik 400 bat korrikalarik zapalduko dute bidea, beraz, are zailago izango dugu atzerago joango garenok.
Zer bilatuko duzu etzi, postua, denbora, beste zerbait?
Ikusita zein eguraldi egingo duen, nire helburua izango da helmugara ondo iristea, eta hiru ordu eta 30etik jaistea.
Zein dira, zure ustez, lasterketaren zatirik gogorrena, eta ederrena?
Gogorrena esango nuke Guadalupeko igoera dela, ordurako jada hanketan 20 bat kilometro eramango ditugulako; igoera, lokatzarekin gainera, latza da. Ederrena? Jaizkibelgo antenatik itsaso aldera jaisten den zatia, itsas ertzeko eremu hori oso ederra da. 
