Farolako errepidea bost hilabetez itxiko dute, astelehenetik

Errepidea egonkortzeko lanak hasiko ditu aldundiak eta bidea itxiko dute martxoa bukaerara arte. Kai berriko maldatik joan beharko da farolara.

Asier Perez-Karkamo

Hondarribia

2017/10/27

2014ko enbata multzoek kostaldea ahuldu zuten eta errepidea egonkortuko du aldundiak

Gipuzkoako Foru Aldundiak Hondarribiko Higerreko Farolara doan errepidea egonkortzeko lanak hasiko ditu datorren astelehenean. Obra bukatzeko bost hilabete beharko dituztela aurreratu du aldundiak, eta epe horretan “trafikoarentzat erabat itxita” egongo da errepidea 2,050 eta 2,500 kilometro puntuen artean. Astelehenetik hasi eta martxoaren 30era arte itxiko dute errepidea. Errepidea eusteko horma berriak eraiki, eta lehendik dauden eustormen oinarria sendotu eta egonkortu behar dute. Horrez gain, errepidearen plataformaren azpiko labarraren ezponda egonkortuko da, Iterlimeneko 20, 21 eta 22 zenbakien eta Lurgorriko etxebizitzen parean. “Egonkortze lan horiek egiteko, buloiak jarriko dira oingabetutako geruzetan, eta metalezko sareak ere jarriko dira, altzairuzko kableez eta buloiez sendotuta”, azaldu du aldundiak. Aipatutako zatia erabat itxiko dutenez, farolara joateko beheko bidetik joan beharko da, Ramon Iribarrenetik, kai berrian hasten den Pierre Lhande kaleko malda igoz. Aldapa hori berez norabide bakarrekoa denez, semaforoak jarriko dituzte ibilgailuak txandaka pasa daitezen. Amuten, eragozpenak astelehenetik Amuten egiten ari diren biribilguneari dagokionez, obra beste fase batean sartuko da, eta horrek eragina izango du trafikoan. Hondarribiko udalak jakinarazi duenez, astelehen eta asteartean goizeko bederatzietatik aurrera trafiko eraginak egongo dira”. Printzipioz, astelehenean Irundik Hondarribiranzko norabidean motelduko da trafikoa, asteartean beste noranzkoak, Hondarribitik Irun aldera.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.