Oriok irabazi du Sestaoko Bandera, larunbatean oso atzetik ibili eta gero.Hondarribiak hirugarren hasi du liga, Bermeok baino bi puntu gutxiagorekin.
Sestaoko Udalaren Bandera irabazi zuen Oriok (arg: Eusko Label Liga)
Ligako lehen ezustekoa eman du Oriok Portugaleteko uretan, atzo Sestaoko Udalaren XVI. Bandera irabazita. Ezustekoa, ez irabazi dutelako, baizik eta
larunbatean ikusitakoaren ondoren ez zuelako ematen iganderako faboritoen artean sar zitekeenik. Larunbatean 27 segundo galdu ondoren irabazi zuen atzo Oriok. Kalearekin abantaila handia atzokoa, edo kontrakoa bezperan. Edo egun txarra larunbatean eta oso ona atzo. Edo bietatik zerbait, edo ezer ere ez. Baina gauza da Oriok irabazi duela Sestaoko Udalaren XVI. Bandera, eta aurreko urteetan baina parekatuagoa hasi dela liga, eta hori arraunarentzat ona da.
Eguraldiaren eta itsasoaren baldintzak onak ziren arren, Nerbioi ibaian edozer gauza gertatu daiteke, eta horrela, lehen tandako irabazle Tiran sailkatu zen bigarren, bost segundo eskasera (4,96). Atzetik Urdaibai, zazpira, eta bermeotarrengandik segundo eta erdira (1,58) helmugaratu zen Ama Guadalupekoa, bi ontzien arteko borroka ederraren ondoren.
Oarsoaldeko bi elkarteak bezperan baino okerrago ibili ziren atzo. San Juan, larunbatean laugarrenaren segundo berdinean sartu eta gero, Portugaleten zortzigarren sailkatu zen, eta seigarren jarri da sailkapenean. Eta San Pedro bederatzigarren iritsi zen atzo, eta sailkapeneko hamargarren postura jaitsi da, baina beste hiru traineruekin berdinduta. Seigarrenetik 11.era hiru puntu besterik ez daude.
Bermeok hartu du aurrea
Heldu den asteburuan Gipuzkoara etorriko da Eusko Label Liga. Larunbatean Orion eta igandean Donostian lehiatuko dira TKEko klubak. Arraunketa eremuei begiratuta, Bizkaiko estreinaldia baino argigarriagoa izan daiteke ligako bigarren asteburua, baina ez ezinbestean.
Ama Guadalupekoa espero zitekeen tokian dago, gutxi gorabehera. Ez du orain arte trapurik irabazi, baina ondo hasi du liga, eta Oria ibaian lehen tandan lehiatuko da. Urdaibai da Eusko Label Ligako lehen liderra, baina alde txikiarekin, puntu batekoa oriotarrekiko eta bikoa Hondarribiarekin alderatuta.
Sailkapen nagusia
- Urdaibai Avia. 22 puntu.
- Orio Babyauto. 21 puntu.
- Hondarribia. 20 puntu.
- Kaiku Producha. 18 puntu.
- Tiran Pereira. 15 puntu.
- San Juan Sumelec. 12 puntu.
- Zierbena Bahias Bizkaia. 10 puntu.
- Cabo. 9 puntu.
- Ares. 9 puntu.
- San Pedro. 9 puntu.
- Ondarroa Cikautxo. 9 puntu.
- Astillero. 2 puntu.
