Egunean ordubetez isilduko dute musika

Musika eskolako langileek bi hilabete daramatzate kobratu gabe eta udalari laguntza eskatu diote. Bihar, asteartea, ordubeteko paroa egingo dute, 19:00etatik 20:00etara.

Asier Perez-Karkamo

Hondarribia

2017/05/22

Aurreko batzordeak zulo ekonomikoa utzi duela jakinarazi dute langileek

Hondarribiko Musika Eskolak bizi duen egoera dela-eta, bertako langileek protesta egingo dute bihar asteartetik hasita. Bi hilabete daramatzate soldata jaso gabe eta erakundea dirurik gabe geratu dela ohartarazi dute. Joan den astean gurasoekin bildu ziren eta musika eskolaren egoera larria dela jakinarazi zieten. Duela hilabete batzuk administrazio batzordea kanporatu zuten, ustezko irregulartasunak medio, eta irakasle talde batek hartu du hezkuntza zentroko kudeaketaren ardura. Orduan jabetu ziren egoeraz, musika eskolak “zulo ekonomikoa” zuela ikusi zuten. Azken bi hilabetetan soldata jaso gabe geratu dira Hondarribiko Musika Eskolako langileak eta udalari laguntza eskatu diote. Bileran azaldu zutenez, musika eskolak ez du azken urteetan udalaren diru-laguntza eskatu eta, beraz, egoeraren berri bazutela iritzi dute langileek. Aste honetan protestak hasiko dituzte musika eskolako langileek. Ordubeteko geldialdiak egingo dituzte egunero, kaltetutako haurren gurasoei aurretik abisatuta. Lehen geldialdia asteartean egingo dute, 19:00etatik 20:00etara. Egoera konpondu ezean, protestak “in crescendo” joango direla nabarmendu dute.

Ikusi geldialdien ordutegiak

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.