Lehen urteko kadetea den arren, Gazte Mailako Gipuzkoako eta Euskadiko txapelketak irabazi ditu irundarrak, eta nagusiekin Gipuzkoako Ohorezko ligan aritzen da, Hondarribiko Marlaxkarekin.
Eskolako lagunekin piztu zitzaion xakearekiko interesa Morenori
Lehen urteko kadetea den arren, Gazte Mailako Gipuzkoako eta Euskadiko xake txapelketak irabazi ditu Patxi Moreno Estebanez irundarrak, eta nagusiekin Gipuzkoako Ohorezko ligan aritzen da, Hondarribiko Marlaxka taldearekin.
Zenbat urterekin hasi zinen xakean jokatzen?
Bost urterekin nire aitak piezak mugitzen erakutsi zidan, baina orduan ez zidan interesa piztu. Gero, eskolan, Toki Alaien, lagunek taula txiki bat ekartzen zuten eta patioan jokatzen aritzen ginen. Asteazkenetan klaseak ematen zituzten eskolan eta joaten hasi nintzen. Lagunetako bat, Ander Tafall, Landetxako (Katea) Auzo Elkartera joaten zen Marlaxka Xake Elkarteak ematen zituen klaseetara, eta egun batean berarekin joateko esan zidan. Joan nintzen, eta gustatu zitzaidan.
Marlaxkarekin Irunen hasi, eta gero Hondarribira?
Landetxan bi edo hiru pertsona aritzen dira txikiekin, interesa pizteko. Baina, berez, hemen [Hondarribiko Kasino Zaharrean] elkartzen gara. Irunen urtebete egon nintzen gutxi gorabehera, gero hona.
Eta aitarekin jarraitzen duzu?
Ez [barrez]. Hilabete gutxira irabazten nion eta ja ez zitzaion gustatzen nire aurka egitea.
Txapelketetan hasieratik parte hartu izan duzu?
Gros elkartea Gipuzkoako talde handiena da, eta bertan txapelketa batzuk antolatzen dituzte haurrentzat; horietara joaten ginen. Baina Gipuzkoako lehen txapelketa hamar edo 11 urterekin jokatu nuen, eta uste dut bigarren geratu nintzela.
Hasieratik izan dituzu emaitza onak, ez? Ez bakarrik zure adinekoen kontra. Orain, kadetea izanik, gazteen txapelduna zara Gipuzkoan, eta Euskadikoa taldeka, Gazte Mailan ere. Haurren Mailan, kadeteen txapelketa irabazi zenuen…
Bai, bueno. Xakean normala da hainbat mailetan jokatzea. Ez da hain berezia. Gipuzkoako Txapelketa, adibidez, kadeteek eta gazteek jokatzen dugu elkarrekin, 18 urtetik beherakoentzat izaten da.
Eta nola da hamalau urterekin zu baino hiru urte gehiago dituztenen kontra irabaztea?
Sorpresa izan zen, baina hasi aurretik rankingean bigarrena ateratzen nintzen, xakean erabiltzen diren ELO puntuak kontuan izanik. Gainera, bai, irabazi nuen, baina lehen hirurek puntutan berdinduta bukatu genuen.
«Hilabete gutxira aitari irabazten nion, eta ja ez zuen nirekin jokatu nahi»
Hori Gipuzkoan. Baina Euskadikoetan ere ondo aritu zara.
Bai, orain arte eskolarteko txapelketetan [Haurren Mailakoak] hirutan jokatu dut, eta hirurak irabazi nituen.
Azkena Bilbon. Eta hor bigarren Ander Tafall geratu zen, zu xakera animatu zintuen laguna. Eta Gipuzkoako txapelketan, zu gazteetan txapelduna eta bera kadeteetan. Polita izango da…
[Barre egiten du] Bai, polita da. Eskolan, Marlaxkan, elkarrekin gabiltza beti. Eta txapelketetan. Ordu asko ematen ditugu elkarrekin. (beheko bideoan Erdi Aroko Azoka azaltzen dira Moreno eta Tafall)
Tafallekin berarekin, Ander Urangarekin eta Ibai Dorronsororekin 18 urtetik beherako Euskadiko Txapelketa irabazi zenuten udazkenean, taldeka.
Urangak eta Dorronsorok guk baino bi edo hiru urte gehiago dituzte. Talde gaztea ginen, bai, baina xakea ez da jende pila bat mugitzen duen kirola. Talde guztiak ziren gurearen antzerakoa, gaztetxoak.
Zer da xakea zuretzat? Joko bat, edo lehia?
Hasi nintzenean denbora asko jokatzen zeraman jendearen kontra aritzen nintzen, eta galtzen ohitu nintzen. Adibidez, Anderrekin [Tafall] beti galtzen nuen, hasieran beti irabazten zidan berak. Gero hasten zara irabazten, eta orduan bai, galtzen duzunean haserretu egiten zara.
Eta, partida hasi aurretik, urduri jartzen al zara?
Ni ez, baina badaude batzuk oso urduri jartzen direnak. Ligako gure taldean badago baten bat… oso urduri jartzen dena, oso. Ni lasai egoten naiz, eta hori garrantzitsua da partida ona jokatzeko. Nire ustez hori nire ezaugarririk onena, normalean ez naizela urduri jartzen.
Eta hobetu behar duzuna?
[Barrez, lotsatuta bezala] beharbada jokatzen ari naizenean, aulkitik altxatzea eta asko paseatzea gustatzen zaidala. Egin daiteke, baimenduta dago, baina ez da ona, denbora galtzen delako, pentsatzen egon beharrean paseatzen zaudelako.
Astean hiru aldiz elkartzen zarete hemen, Kasino Zaharrean. Zer da lantzen duzuena?
Marlaxkan asko jokatzen dugu, gehienetan jokatzen egoten gara, ezpada norbait etortzen dela klaseak ematera. Beste leku batzuetan serioago hartzen dute, ordu gutxiago ematen dute jokatzen.
Eta etxean gehiago lantzen duzu xakea?
Berez egin beharko nuke, goi mailakoen partidak ikusi, gauzak nola doazen jakin… Baina ez dut asko egiten. Ostiraletan, benetan ona den norbait izaten dugu hemen klaseak ematen, eta Euskadiko Federazioak gazteekin online ikastaroak antolatzen ditu, beste jokalari on batekin. Gero etxean gehiago egin beharko nuke.
Iaz Benidormen egon ginenean [taldekako 18 urtez azpikoen Espainiako txapelketan], bazen jende asko egunean sei edo zazpi ordu sartzen zituela esaten zuena. Noski, hori eginez gero, nabaritzen da, asko hobetzen duzu. Ni egon izan naiz, lotu egiten bazara egin dezakezu, baina asko kostatzen zait lau edo bost ordu egotea, egin beharko nuke, baina kostatzen zait.
Marlaxkako haurrak eta nagusiak, Kasino Zaharreko lorategietan jokoan
Zure entrenatzaileek zure adina zutenean, Karpoven edo Kasparoven artean aukeratu behar zuten. Zuk, ba al duzu xakelari faboritorik?
Niri jokalari erasokorrak gustatzen zaizkit. Maila gorenean izan daitezke partida oso luzeak, niretzat ez dira aspergarriak, baina badira hamargarren mugimendurako berdinketan bukatuko direla diruditen partida oso luzeak. Horregatik, jokalari erasokorrak nahiago ditut. Horien artean Hikaru Nakamura asko gustatzen zait, estatubatuarra da.
Lehen urteko kadetea zara eta gazteen txapelketak irabazi dituzu, eta nagusiekin lehiatzen zara ligan. Iruditzen al zaizu oso azkar joan dela dena?
Duela bi urte egiten nituen partidak ikusi izan ditut, eta bai ohartu naiz asko ikasi dudala. Baina bi urte barru gauza bera esan ahal izatea espero dut.
Bistan da gustura zabiltzala. Urte batzuetara xakean jarraituko duzula ematen du.
Behin lotzen zarela erraza da jarraitzea. Kanpotik aspergarria ematen duen kirola da, baina barrutik oso polita da. Bai, hurrengo urteetan xakean jokatzen jarraituko dudala uste dut.
Zer eman dizu zuri xakeak?
Niretzat garrantzitsuena da dibertitzen nauela, lagun asko egin ditut xakearekin, eta asko bidaiatu dugu, xakeagatik ez balitz, egon naizen leku askotara ez nintzen inoiz joango. Inoiz ez nuen pentsatuko hau gertatuko zenik. Toki-Alaien hasi nintzenean, Landetxara lehen aldiz joan nintzenean, pixka bat jokatzeko eman nuen izena, ez beste ezertarako. Zuk esan duzu, egia da orain arte oso azkar pasatu dela dena.
Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.
Hasi saioa HITZAkide gisa
Saioa hasten baduzu, HITZAkide izatearen abantailak baliatu ahal izango dituzu.
HITZAkide naiz, baina oraindik ez dut kontua sortu SORTU KONTUA
Zure kontua ongi sortu da.
Hemendik aurrera, zure helbide elektronikoarekin eta pasahitzarekin konektatu ahal zara, HITZAkide izatearen abantaila guztiak baliatzeko.
Ezagutu HITZAkide izatearen abantailak eta aukeratu HITZAkide izateko gustuko modalitatea
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.
Ezagutu HITZAkide izatearen abantailak eta aukeratu HITZAkide izateko gustuko modalitatea.
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.
