Omenaldi beroena, etxekoena

Ion Areitio hondarribiarrak etxekoen eta lagunen ezusteko omenaldia jaso du, joan den astean Munduko Bike-Trial Txapelketan brontzea lortu ondoren.

Asier Perez-Karkamo

Hondarribia

2016/09/10

Konfeti artean hartu dute etxekoek eta lagunek Ion Areitio

Ion Areitio txirrindulariak bere bizitzako ezustekoa hartu du gaur goizean Hondarribiko Azeri elkartera hurbildu denean. Hobe esanda, hurbildu dutenean. Izan ere, Arrantzale Eguneko jai giroa probestuz, Portuan bueltaka ibili baitute txirrindularia, Azerin prestatzen ari zirena ikusi ez zezan. “Zorionak Ion” zioen pankarta jarri dute elkartearen balkoian eta, goiko balkoitik, lehiatzeko erabiltzen duen Monty bizikleta eskegi dute. Hala, Abiyuan txarangaren atzetik Azeri parera hurbildu denean, dozenaka lagunek txalo eta konfeti artean hartu dute Areitio. Joan den asteburuan Munduko Bike-Trial Txapelketan brontzea lortu eta gero, goizean udaletxean oroigarria jaso du, baina ez zuen espero gerorako prestatu diotena. Senideek eta lagunek omenaldi sorpresa eskaini diote, eta jendetza bildu da pilotuari harrera egiteko. Bidasoaldeko EKT-ko Joxeja Zabalok aurkeztu du ekitaldia, eta lagunek egin dute gainontzekoa: Agurra dantzatu, trikitixa jo, bere omeneko bertsoa abestu, txapela jantzi… Lortu dituen guztientzako dagoeneko leku soberan ez du izango baserrian. Txapel denak dira inportanteak beretzat, guztiak ondo merezitakoak, baina berezienetako bat jantzi du gaur, gutxien esperotakoa seguruenik.

Areitioren bizikleta eskegitzen, omenaldirako

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.