Txilibituak ja zorroztuta, jaien esperoan
Hilaren 6tik 11ra herriko festak ospatuko dituzte hondarribiarrek. Ohi bezala, hilaren 6a, 8a eta 10a izango dira aurten ere jendetsuenak, baina gainontzekoetan ere ez da atsedenik izango.
Txistulariak Kale Nagusian gora Titi-biliti doinuak joaz
6 Txikiek hasiko dute festa
Hondarribian haurrak helduei aurreratzen zaizkie eta egun bat lehenago hasten dituzte festak. Hilaren 6an goizeko 11:00etan jaurtiko dute haurren txupina eta ordu erdi geroago zezen puzgarriek entzierro arriskutsua burutuko dute Santa Maria atetik abiatuta. Astearteko kontzertu nagusia Delorean taldearen eskutik iritsiko da.
7 Berriro hasiko dira jaiak
Jaien hasiera ofiziala hilaren 7an izaten da, 12:00etan, suziriaren jaurtiketarekin eta urrezko dominen banaketarekin. Lurdes Zubeldia Nere sukaldetxoan liburuaren egileak eta Mercedes Iridoy Josu Zabala hil zutenean alkate zenak jasoko dute oroigarria aurten. Zabalaren omenaldia 7ra aurreratu dute aurten —8an egin izan da beti, egun horretan hil baitzuten—; 17:00etan egingo dute. Arratsean udalbatzak aurreskua dantzatuko du Arma Plazan, Te Deum eta Salbea-ren ondoren.
8 Alarde Eguna
Festetako egun handia da 8a, Alardearen eguna. Herri osoa aterako da kalera, batzuk parte hartzera, besteak tropen ibilbideak ikustera. Beste behin, lau desfile izango dira aurten, bina goizez eta arratsaldez. Zailtasunak zailtasun, Jaizkibel konpainia parekideak hogeigarrenez jardungo du. Gauean ez da girorik faltako, besteak beste, Kresala taldearen erromeriarekin.
9 Helduen ajea, haurren aukera
Alardearen biharamunean helduek atsedena behar izaten dute eta haurrak eta gaztetxoak horretaz baliatzen dira. Taka-taka motoen lasterketa, parke erraldoia, sokamuturra, puzzle lehiaketa… Haurren eguna izaten da hilaren 9a baina arratsean ezin galdu Kemen Dantza Taldearen erakustaldia Arma Plazan, eta gauez Patxoko Nice, Cobra eta Niña Coyote eta Chico Tornado banden emanaldia Bentan.
10 Arrantzale Eguna, gazteena
1638ko setioan hildakoen aldeko ospakizunez aparte, parrandarako aitzakia paregabea izaten da Arrantzale Eguna. Gazteek goizetik hasten dute festa, Bidasoaldeko EKTk antolatutako jokoekin eta koadrilen bazkariarekin. Bazkalostean festak ez du etenik izango; Hondarribiko Elektro-Patxaranga, DJ Kanu eta Ken Zazpi arduratuko dira horretaz. Giro lasaiagoa bilatzen dutenek Arma Plazan aurkituko dute, Gontzal Mendibilekin.
11 Azoka baino askoz gehiago
Baserritarren Egunarekin bukatzen dira Hondarribiko festak. Zumardia aldean izaten da festa, goiz eta arratsaldez, baina azken urteetan hilaren 11ko festa eremua zabaldu egin da. Herri kirolak, bertsolariak, pailazoak, pilota, erromeria, kantu-jira… egun handia da jaien azkenengoa. Su artifizialek itxiko dute pertsiana, hori bai, Doctor Deseo taldearen ondoren.
