Ama Guadalupekoak irabazi du Lekeitioko XXXVII. Bandera, Kaiku eta Bermeo oso atzean utzita. B ontzien erlojupeko proba ere bikingoentzat izan da. Nesketan Hibaika gailendu da.
Gizonen bi estropak irabazi ditu Hondarribiak Lekeition
Ama Guadalupekoa traineruak Lekeitioko XXXVII. Bandera, Gure Esku Dago I. Estropada irabazi zuen atzo, igandez. Aurreko asteburuan Mutrikun ez bezala, ligan aurkari nagusi izango dituen ontzien kontra lehiatu zen Hondarribia, hala nola Kaiku edota Bermeo; hurrenez hurren, bigarren eta hirugarren tokian geratu ziren bi bizkaitarrak, eta Ama Guadalupekoarekin batera, 20 minututik jaitsi ziren bakarrak izan ziren. Baina Hondarribiak nagusitasun handia erakutsi zuen haiekiko, hamabi segundo atereaz bigarren Kaikuri eta hamalau sugundo Urdaibaikoei (
ikusi denborak).
San Pedroko Libiak oso lan txukuna egin zuen eta bermeotarren atzetik geratu ziren, hiru hamarrenera soilik. Pasaiako beste ordezkariak, Koxtapek, hainbat hutsune tarteko, ez zuen egun ona eduki eta aurrekoetatik oso urruti geratu zen.
B ontzien lehia ere egin zuten Lekeition, eta horretan ere, bikingoak nagusi. Hamalau traineru lehiatu ziren erlojuaren kontra eta HAEko bigarren ontziak lortu zuen denborarik onena, 20 minutu eta 42 segundo. Zarautz sailkatu zen bigarren, 3 segundora eta Deusto hirugarren, 9ra.
Emakumeena, Hibaikak
Emakumeen estropadan, Hibaika izan zen onena, Gezala ahizpa hondarribiarren parte hartzearekin. Orioren eta Zarautz-Getariaren aurretik geratu zen Hibaika. Estropadan parte hartu zuen Oarsoaldeko beste ordezkariak, Oiartzungo Itsaslapurren traineruak, itxi zuen txanda.
