"Zubieta leku egokia da kirol instalazioa eraikitzeko"

Irungo alkateak uste du lau edo bost urtetan mugitu dezaketela Plaiaundiko kirol gunea

Asier Perez-Karkamo

2015/03/16

Santano, Arantxa Tapiarekin

Jose Antonio Santano Irungo alkatearen arabera, 4-5 urte beharko dira Plaiaundiko kirol gunea ordezkatuko dituen azpiegitura eraikitzeko. Zubieta-Urdanibia Parke Teknologiko berrian kokatuko litzateke eta “instalazio egokiak” izango direla aurreratu du, “handiak”. Joan den ostegunean egin zuten Miramongo parke teknologikoa Zubieta Urdanibian zabaltzeko hitzarmenaren izenpetzea. Ekitaldiaren ostean, HITZAren galderei erantzunez, eremu horretan Plaiaundiko kirol instalazioak ordezkatuko dituen gunea kokatuko dela aurreratu zuen Santanok. “Lur egokiena zein den gutxi gorabehera zehaztuta dago eta planoan kokatuta”. Parke teknologikoa Hondarribiko Zubietan (bi heren) eta Irungo Urdanibia artean eraikiko dute. Hitzarmena sinatuta, konpatibilizazio plangintza prestatu behar dute, ondoren lurrak erosi, eta hirugarren urratsa litzateke parkea eraikitzen hastea. Baina Irungo alkateak uste du kirol gunea aurreratu daitekeela: “Hurrengo urratsa izango da konpatibilizazio plangintza prestatzea, eta hori eta gero, hirigintzako tresnekin aukera izango genuke lurrak erosteko. Gure asmoa da interbentzio hori aurreratzea, kirol gunea aurreratzea”. Hala, laupabost urtetan kirol gunea eginda egoteko aukera dagoela erantsi du alkateak: “Nire iritzia da, baina proiektu hori datozen lau bost urtetan garatzeko aukera izango da”. Lehenengo kirol gune berria eraikiko dutela gaineratu zuen, “eta gero Plaiaundikoa kendu”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.